(ម៉ានីល)៖ នៅថ្ងៃអង្គារនេះ ក្រសួងការបរទេសហ្វីលីពីនបានគូសបញ្ជាក់ឡើងវិញអំពី «គោលនយោបាយចិនតែមួយ» បន្ទាប់ពីលោកប្រធានាធិបតី Ferdinand Marcos Jr ផ្ញើសារអបអរសាទរដល់មេដឹកនាំថ្មីតៃវ៉ាន់ លោក Lai Ching-te ដែលទើបនឹងជាប់ឆ្នោត។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអង្គារ ទី១៦ ខែមករា ឆ្នាំ២០២៤។

ក្រសួងការបរទេសហ្វីលីពីន បានបញ្ជាក់ក្នុងសេចក្តីថ្លែងការណ៍ថា «សារនេះ សបញ្ជាក់អំពីការគិតរបស់ លោក Marcos ក្នុងការទទួលស្គាល់ផលប្រយោជន៍ទៅវិញទៅមក រវាងហ្វីលីពីន និងតៃវ៉ាន់ រួមទាំងកម្មករចំណាកស្រុកហ្វីលីពីន ចំនួន ២០០,០០០នាក់​ នៅទីនោះ»។

សេចក្តីថ្លែងការណ៍ដដែល បានបន្ថែមថា «ការអបអរសាទរជូនចំពោះមេដឹកនាំថ្មីតៃវ៉ាន់ ពីសំណាក់ លោក Marcos គឺវិធីសម្តែងការអរគុណសម្រាប់ ការទទួលយកកម្មករចំណាកស្រុកហ្វីលីពីនឲ្យធ្វើការ និងការប្រព្រឹត្តទៅដោយជោគជ័យ នៃដំណើរការប្រជាធិបតេយ្យ។ យ៉ាង​នេះក្តី ហ្វីលីពីននៅតែគោរពគោលនយោបាយចិនតែមួយ»។

គួរបញ្ជាក់ថា ហ្វីលីពីន ដែលធ្លាប់សម្តែងក្តីបារម្ភជុំវិញភាពតានតឹងនៅឯច្រកសមុទ្រតៃវ៉ាន់ មានទំនាក់ទំនងជាមួយទីក្រុងតៃប៉ិ ដោយមានការិយាល័យសេដ្ឋកិច្ច និងវប្បធម៌ហ្វីលីពីនប្រចាំនៅតៃវ៉ាន់ បម្រើកិច្ចការជាស្ថានទូត៕

រូបភាពពី Reuters