(វ៉ាស៉ីនតោន)៖ មន្ទីរបញ្ចកោណ បានប្រកាសថា រដ្ឋមន្រ្តីការពារជាតិអាមេរិក លោក Lloyd Austin បានចេញពីមន្ទីរពេទ្យវិញហើយ កាលពីថ្ងៃចន្ទសប្តាហ៍នេះ ក្រោយចូលសម្រាកព្យាបាលអស់ពីរសប្តាហ៍ ដោយសារតែមានបញ្ហាទាក់ទងនឹងជំងឺមហារីកក្រពេញប្រូស្តាត។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអង្គារ ទី១៦ ខែមករា ឆ្នាំ២០២៤។

ក្រោយចេញពីមន្ទីពេទ្យ លោក Austin បានថ្លែងអំណរគុណដល់ក្រុមគ្រូពេទ្យនៅមជ្ឈមណ្ឌល​វេជ្ជសាស្ត្រ​យោធា​ជាតិ Walter Reed សម្រាប់ការ​មើលថែទាំ​ដ៏​ល្អឥតខ្ចោះចំពោះរូបលោក។ ក្រុមគ្រូពេទ្យនៃ Walter Reed បានឲ្យដឹងថា លោក Austin បានទទួលការធ្វើតេស្ត និងការថែទាំដោយមិនវះកាត់ ឲ្យជាសះស្បើយដែលរួមទាំងការឈឺជើង ហើយមិនត្រូវការការព្យាបាលជំងឺមហារីកបន្ថែមទៀតនោះទេ។

ចំណែកក្រុមគ្រូពេទ្យផ្ទាល់ខ្លួនរបស់ លោក Austin បានបញ្ជាក់យ៉ាងដូច្នេះថា «ជំងឺមហារីកក្រពេញប្រូស្តាតរបស់ លោករដ្ឋមន្រ្តី Austin ត្រូវ​បាន​ព្យាបាល​ទាន់​ពេល និង​មាន​ប្រសិទ្ធភាព ហើយស្ថានភាពរបស់គាត់គឺ​ល្អ​ណាស់។ លោកមិនត្រូវព្យាបាល​ជំងឺ​មហារីកទៀតទេ ​ក្រៅ​តែពី​ការ​តាម​ដាន​ក្រោយ​​​វះកាត់ក្រពេញ​ប្រូស្តាត​ ជា​ប្រចាំនោះ»។

គួរបញ្ជាក់ថា បើតាមការបញ្ជាក់របស់មន្ទីរបញ្ចកោណ លោក Austin នឹងធ្វើការពីចម្ងាយ តាមរយៈប្រព័ន្ធទំនាក់ទំនងដ៏មានសុវត្ថិភាព មុនពេលត្រលប់មកកាន់ការិយាល័យវិញ៕

រូបភាពពី Reuters