(គែរ)៖ រដ្ឋមន្ត្រីការបរទេសចិន លោក Wang Yi កាលពីថ្ងៃអាទិត្យ (ទី១៤ មករា) បានអំពាវនាវឱ្យមានការបង្កើតរដ្ឋប៉ាឡេស្ទីន និងបទឈប់បាញ់នៅតំបន់ហ្គាហ្សា ជាកន្លែងដែលសង្រ្គាមជាងមួយរយថ្ងៃមកនេះរវាងអ៊ីស្រាអែល និងក្រុមហាម៉ាស់ បានធ្វើឱ្យមនុស្សរាប់ពាន់នាក់ស្លាប់។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃទី១៤ ខែមករា ឆ្នាំ២០២៤។

អ្នកការទូតកំពូលរបស់ចិន បាននិយាយនៅក្នុងសន្និសីទសារព័ត៌មាននៅទីក្រុងគែ រជាមួយសមភាគីអេហ្ស៊ីប លោក Sameh Shoukry ដូច្នេះថា «ចាំបាច់ត្រូវតែបង្កើតរដ្ឋប៉ាឡេស្ទីនមួយដែលឯករាជ ដែលមានអធិបតេយ្យភាពពេញលេញនៅលើព្រំដែនឆ្នាំ ១៩៦៧ ដោយមានទីក្រុងហ្សេរុយសាឡឹមខាងកើតជារដ្ឋធានីរបស់ប្រទេសនេះ»។

រដ្ឋមន្ត្រីទាំងពីរបានចេញសេចក្តីថ្លែងការណ៍រួមមួយ ដោយជំរុញឱ្យបញ្ចប់ជាបន្ទាន់ចំពោះ «រាល់អំពើហឹង្សា ការសម្លាប់ និងការកំណត់គោលដៅលើជនស៊ីវិល និងគ្រឿងបរិក្ខារស៊ីវិល»។

លោក Shoukry និង Wang ក៏បានអំពាវនាវឱ្យមាន «កិច្ចប្រជុំកំពូលសន្តិភាពអន្តរជាតិ ដើម្បីស្វែងរកដំណោះស្រាយដ៏ត្រឹមត្រូវ ទូលំទូលាយ និងយូរអង្វែងចំពោះបុព្វហេតុប៉ាឡេស្ទីន ដោយបញ្ចប់ការកាន់កាប់ (អ៊ីស្រាអែល) និងបង្កើតរដ្ឋប៉ាឡេស្ទីនឯករាជ្យផងដែរ»។

គួរបញ្ជាក់ថា លោក Wang កំពុង​តែ​ធ្វើ​ដំណើរ​ទៅ​កាន់​ទ្វីប​អាហ្រ្វិក ជា​ទី​ដែល​លោក​នឹង​ទៅ​ទស្សនកិច្ចនៅ​ប្រទេស​តូហ្គោ ទុយនីស៊ី និង​កូតឌីវ័រផងដែរ។ តំបន់ហ្គាហ្សាស្ទ្រីប និងតំបន់វេសប៊ែងដែលជាផ្ទះរបស់អាជ្ញាធរប៉ាឡេស្ទីន ត្រូវបានបំបែកដោយទឹកដីអ៊ីស្រាអែល។ តំបន់ទាំងពីរត្រូវបានកាន់កាប់ ដោយអ៊ីស្រាអែលនៅក្នុងសង្គ្រាមប្រាំមួយថ្ងៃនៅឆ្នាំ ១៩​៦៧៕