(បេរ៉ូត)៖ ប្រភពសន្តិសុខចំនួនបីឱ្យដឹងថា ការវាយប្រហាររបស់អ៊ីស្រាអែលលើភាគខាងត្បូងប្រទេសលីបង់នៅថ្ងៃចន្ទ (ទី០៨ មករា) បានសម្លាប់មេបញ្ជាការជាន់ខ្ពស់ម្នាក់ នៅក្នុងកងកម្លាំង Radwan របស់ក្រុមហេសបូឡា។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃទី០៨ ខែមករា ឆ្នាំ២០២៤។

ប្រភពសន្តិសុខបានកំណត់អត្តសញ្ញាណមេបញ្ជាការជាន់ខ្ពស់នោះ ថាជា លោក Wissam Al-Taweel ដែលអនុប្រធានអង្គភាពមួយនៅក្នុងកងកម្លាំង Radwan ។ ពួកគេបាននិយាយថា គាត់និងអ្នកប្រយុទ្ធហេសបូឡា ម្នាក់ទៀតក៏បានស្លាប់ផងដែរ នៅពេលដែលរថយន្តរបស់ពួកគេត្រូវបានវាយប្រហារ នៅក្នុងការវាយឆ្មក់លើភូមិ Majdal Salam ប្រទេសលីបង់។

ប្រភព​សន្តិសុខ​ម្នាក់​បាន​និយាយ​ថា​ «​នេះ​ជា​ការ​វាយ​ប្រហារ​ដ៏​ឈឺចាប់​មួយ​»។ ម្នាក់​ទៀត​បាន​និយាយ​ថា​ ​«​អ្វីៗ​នឹង​ឡើង​កម្ដៅ​ឥឡូវ​នេះ»។

គួរបញ្ជាក់ថា ការទម្លាក់គ្រាប់បែករបស់អ៊ីស្រាអែលនៅភាគខាងត្បូងប្រទេសលីបង់ បានសម្លាប់យុទ្ធជនហេសបូឡាជាង ១៣០នាក់មកហើយ ចាប់តាំងពីការចាប់ផ្តើមនៃការទម្លាក់គ្រាប់បែកឆ្លងព្រំដែន បន្ទាប់ពីការវាយប្រហាររបស់ក្រុមហាម៉ាស់ នៅលើទឹកដីអ៊ីស្រាអែលកាលពីថ្ងៃទី ៧ ខែតុលា។ ចំណែក ១៩​នាក់​ផ្សេង​ទៀត​ត្រូវ​បាន​សម្លាប់​ក្នុង​ប្រទេស​ស៊ីរី​។

អគ្គលេខាធិការក្រុមហេសបូឡា លោក Hassan Nasrallah បានព្រមានអ៊ីស្រាអែល នៅក្នុងសុន្ទរកថាតាមទូរទស្សន៍ចំនួនពីរលើកកាលពីសប្តាហ៍មុន ប្រឆាំងនឹងការចាប់ផ្តើមសង្រ្គាមទ្រង់ទ្រាយធំលើប្រទេសលីបង់។ លោក Nasrallah បាននិយាយដូច្នេះថា «អ្នកណាដែលគិតអំពីសង្រ្គាមជាមួយពួកយើង នឹងស្តាយក្រោយ៕

រូបភាពពី AFP