(ហ្សឺណែវ)៖ អង្គការសុខភាពពិភពលោកបាននិយាយថា ខ្លួនត្រូវបង្ខំចិត្តឱ្យលុបចោលបេសកកម្មនាំយកគ្រឿងផ្គត់ផ្គង់វេជ្ជសាស្រ្តទៅកាន់តំបន់ហ្គាហ្សាភាគខាងជើងកាលពីថ្ងៃអាទិត្យ (៧ មករា) បន្ទាប់ពីបរាជ័យក្នុងការទទួលបានការធានាសន្តិសុខ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃទី០៨ ខែមករា ឆ្នាំ២០២៤។

WHO បាននិយាយថា នេះជាលើកទីបួនហើយចាប់តាំងពីថ្ងៃទី ២៦ ខែធ្នូ ដែលខ្លួនត្រូវបង្ខំឱ្យលុបចោលបេសកកម្មដែលបានគ្រោងទុក សម្រាប់ការនាំយកគ្រឿងបរិក្ខាពេទ្យដែលត្រូវការបន្ទាន់​ ទៅផ្គត់ផ្គង់ដល់មន្ទីរពេទ្យ Al Awda និងឱសថស្ថាននៅភាគខាងជើងតំបន់ហ្គាហ្សា។

ការិយាល័យ WHO នៅតំបន់ហ្គាហ្សាបានសរសេរ នៅលើបណ្តាញទំនាក់ទំនងសង្គម X ដូច្នេះថា «វាមានរយៈពេល ១២ ថ្ងៃហើយ ចាប់តាំងពីយើងបានទៅដល់ភាគខាងជើងហ្គាហ្សា...ការទម្លាក់គ្រាប់បែកយ៉ាងខ្លាំងក្លា ការរឹតបន្តឹងលើការធ្វើដំណើរ និងការរំខានដល់ការទំនាក់ទំនងបានធ្វើឱ្យការដឹកជញ្ជូនគ្រឿងបរិក្ខាពេទ្យប្រកបដោយសុវត្ថិភាព និងទៀងទាត់នៅទូទាំងតំបន់ហ្គាហ្សាស្ទ្រីប ស្ទើរតែមិនអាចទៅរួចទេ ជាពិសេសនៅភាគខាងជើង»។

អង្គការសុខភាពពិភពលោក (WHO) បាននិយាយថា ការចែកចាយដែលបានគ្រោងទុកកាលពីថ្ងៃអាទិត្យ ត្រូវបានរៀបចំឡើងដើម្បីទ្រទ្រង់ប្រតិបត្តិការនៃមន្ទីរពេទ្យចំនួនប្រាំនៅភាគខាងជើងនៃតំបន់ជុំវិញ។

អគ្គនាយក WHO លោក Tedros Adhanom Ghebreyesus បាននិយាយថា លោកមានការភ្ញាក់ផ្អើលចំពោះតម្រូវការសុខភាព និងទំហំនៃការបំផ្លិចបំផ្លាញនៅភាគខាងជើងតំបន់ហ្គាហ្សា។ លោកបានលើកឡើងថា «ការពន្យារពេលបន្ថែមទៀតនឹងបណ្តាលឱ្យមានការស្លាប់និងការឈឺចាប់កាន់តែច្រើន»។

នៅក្នុងការអត្ថាធិប្បាយដាច់ដោយឡែកមួយ គណៈកម្មាធិការសង្គ្រោះអន្តរជាតិបាននិយាយថា ក្រុមគ្រូពេទ្យសង្គ្រោះបន្ទាន់របស់ពួកគេ និងសមាគមជំនួយវេជ្ជសាស្ត្រប៉ាឡេស្ទីន ត្រូវបានបង្ខំឱ្យដកខ្លួន និងបញ្ឈប់សកម្មភាពរបស់ខ្លួននៅមន្ទីរពេទ្យ Al-Aqsa នៅតំបន់កណ្តាលនៃហ្គាហ្សា ដោយលើកឡើងពីការកើនឡើងនៃសកម្មភាពយោធារបស់អ៊ីស្រាអែលនៅក្នុងតំបន់។

គួរបញ្ជាក់ថា ការវាយលុករបស់អ៊ីស្រាអែលដែលបានចាប់ផ្តើម បន្ទាប់ពីការវាយប្រហារដ៏សាហាវរបស់ក្រុមហាម៉ាស់នៅភាគខាងត្បូងអ៊ីស្រាអែលកាលពីថ្ងៃទី ៧ ខែតុលា បានធ្វើឱ្យមានការបំលាស់ទីលំនៅរបស់ប្រជាជនភាគច្រើននៅតំបន់ហ្គាហ្សា បំផ្លិចបំផ្លាញផ្ទះសម្បែង និងហេដ្ឋារចនាសម្ព័ន្ធស៊ីវិលជាច្រើន និងបណ្តាលឱ្យមានការខ្វះខាតស្បៀងអាហារ ទឹក និងថ្នាំពេទ្យយ៉ាងធ្ងន់ធ្ងរ៕

រូបភាពពី Reuters