(វ៉ាស៉ីនតោន)៖ យានរ៉ូបូតរបស់សហរដ្ឋអាមេរិក ដែលនឹងទៅធ្វើការព្យាយាមចុះចត នៅលើឋានព្រះចន្ទជាលើកដំបូងបំផុត គិតក្នុងរយៈពេល​កន្លះសតវត្សរ៍ គឺត្រូវបានបញ្ជូនចេញពីផ្ទៃផែនដីនៅថ្ងៃចន្ទនេះ ខណៈវាគឺជាបេសកកម្ម ស្ថិតក្រោមការដឹកនាំរបស់ឧស្សាហកម្មឯកជន មិនមែន​រដ្ឋាភិបាលអាមេរិកនោះឡើយ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃចន្ទ ទី៨ ខែមករា ឆ្នាំ២០២៤។

រ៉ុក្កែតប្រភេទថ្មីសន្លាង ឈ្មោះ Vulcan Centaur របស់ក្រុមហ៊ុន United Launch Alliance បានហោះចាកចេញពីរដ្ឋ Florida កាលពីវេលាម៉ោង២៖១៨នាទី យប់រំលងអធ្រាត្រឈានចូលថ្ងៃចន្ទ ទី៨ ខែមករា (ម៉ោងក្នុងតំបន់នៅអាមេរិក) ក្នុងបេសកកម្មលើកទីមួយរបស់វា និងមានផ្ទុកយានរ៉ូបូតឈ្មោះថា Peregrine ផលិតឡើងដោយក្រុមហ៊ុន Astrobotic Technology។ បេសកកម្មនេះ ប្រព្រឹត្តទៅ​ក្រោមកម្មវិធី Commercial Lunar Payload Services (CLPS) របស់ទីភ្នាក់ងារអវកាសអាមេរិក NASA។ យោងតាមផែនការ យាន Peregrine នឹងទៅចុះទៅដល់តំបន់មួយនៃផ្ទៃព្រះចន្ទ ហៅថា Sinus Viscositatis នៅថ្ងៃទី២៣ ខែកុម្ភៈ ឆ្នាំនេះ។

គួរបញ្ជាក់ថា មកទល់ឥឡូវ មានតែទីភ្នាក់ងារអវកាសនៃរដ្ឋាភិបាលប្រទេសមួយចំនួនតូចប៉ុណ្ណោះ ដែលបានទទួលជោគជ័យ ក្នុងការបញ្ជូន​យានរ៉ូបូតទៅចុះចតដល់លើផ្ទៃព្រះចន្ទ។ ក្នុងចំណោមនោះ អតីតសហភាពសូវៀត (រុស្ស៉ី) ជាអ្នកសម្រេចបានដំបូងគេកាលពីឆ្នាំ១៩៩៦ ហើយបន្ទាប់មកទៀត សហរដ្ឋអាមេរិកដែលនៅបន្តជាប្រទេសតែមួយគត់លើលោក ដែលបាននាំមនុស្សទៅដល់ទីនោះ ថែមទៀតផង។ ចំណែក ចិនវិញបានទទួលជោគជ័យ៣លើក អំលុងមួយទសវត្សរ៍កន្លងមកនេះ ខណៈឥណ្ឌាគឺជាអ្នកសម្រេចបានជោគជ័យនេះ ចុងក្រោយគេ ក្នុងការប៉ុនប៉ងលើកទី២របស់ខ្លួន កាលពីឆ្នាំមុន៕

រូបភាពពី Reuters