(តូក្យូ)៖ នៅរសៀលថ្ងៃចន្ទនេះ អាជ្ញាធរខេត្ត Ishikawa ភាគកណ្តាលប្រទេសជប៉ុន បានប្រកាសពីតួលេខថ្មី នៃអ្នកបាត់ខ្លួនដោយសារ​គ្រោះរញ្ជួយដី៧.៦រ៉ិទ័រ ដែលបានវាយប្រហារកាលពីថ្ងៃឆ្លងឆ្នាំសកល គឺកើនដល់៣២៣នាក់ ខណៈតួលេខអ្នកស្លាប់កើនដល់១៦៨នាក់។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃចន្ទ ទី៨ ខែមករា ឆ្នាំ២០២៤។

វាគឺជាការធ្វើបច្ចុប្បន្នភាពលើ តួលេខអ្នកស្លាប់និងបាត់ខ្លួន​ ដែលកាលពីព្រឹកថ្ងៃចន្ទនេះ ស្ថិតនៅ១៦១នាក់ស្លាប់ និង១០៣នាក់បាត់ខ្លួន។ រីឯផ្ទះសម្បែងប្រហែល១៨,០០០គ្រួសារ ក្នុងខេត្ត Ishikawa គឺបន្តគ្មានអគ្គិសនីប្រើប្រាស់នៅថ្ងៃចន្ទនេះ ខណៈជាង៦៦,១០០គ្រួសារ គ្មានទឹកប្រើប្រាស់គ្រប់គ្រាន់ កាលពីថ្ងៃអាទិត្យ។ យោងតាមប្រព័ន្ធផ្សព្វផ្សាយក្នុងស្រុក មនុស្សជាច្រើននាក់ក្នុងចំណោមប្រមាណ​២៨,៨០០នាក់ ដែលបានទៅជ្រកកោននៅតាម មណ្ឌលស្នាក់អាស្រ័យបណ្តោះអាសន្នរបស់រដ្ឋាភិបាល ក៏កំពុងប្រឈមបញ្ហាខ្វះខាតទឹក អគ្គិសនី និងម៉ាស៉ីនកម្តៅ ផងដែរ។

គួរបញ្ជាក់ថា ជប៉ុនកាលពីឆ្នាំ២០១១ បានរងគ្រោះដោយសារការរញ្ជួយដីដ៏មហាប្រល័យមួយ រួចបង្កើតទៅជារលកយក្សស៊ូណាមិ និងដែលបានបន្សល់ទុកមនុស្សប្រហែល ១៨,៥០០នាក់ស្លាប់ឬបាត់ខ្លួន ហើយបង្កជាគ្រោះមហន្តរាយ នៅរោងចក្រថាមពលនុយក្លេអ៊ែរ Fukushima ថែមទៀតផង៕

">

រូបភាពពី CGTN