(កៀវ)៖ ក្រុមមន្រ្តីអ៊ុយក្រែនបានឱ្យដឹងថា នាថ្ងៃសុក្រនេះ រុស្ស៉ីបានបើកការវាយប្រហារមីស៉ីលដ៏ធំបំផុតមួយ ដែលបានផ្តាច់ជីវិត​មនុស្សសរុប១០នាក់ និងបង្កឱ្យរបួសយ៉ាងហោចណាស់៦០នាក់ផ្សេងទៀត នៅក្នុងទីក្រុងកៀវ ព្រមទាំងនៅតំបន់ភាគខាងលិច ភាគកណ្តាល ក៏ដូចជា​ភាគខាងកើតអ៊ុយក្រែន។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃសុក្រ ទី២៩ ខែធ្នូ ឆ្នាំ២០២៣។

អំលុងការវាយប្រហារខាងលើ មនុស្ស២នាក់បានស្លាប់នៅរដ្ឋធានីកៀវ និងជាច្រើននាក់ទៀត ត្រូវគេជឿថាអាចជាប់ក្រោមគំនរបាក់បែក ​នៃអគារដែលរងការខូចខាតពីការវាយប្រហារ។ ក្នុងចំណោមអ្នកបាត់បង់ជីវិត ក៏មាន២នាក់នៅទីក្រុងកំពង់ផែ Odesa ជាប់សមុទ្រខ្មៅផងដែរ ហើយយ៉ាងហោច១៥នាក់រងរបួស ក្នុងនោះរួមមានទាំងក្មេងៗ២នាក់ ខណៈមីស៉ីលរុស្ស៉ីបានធ្លាក់ទៅចំអគារស្នាក់នៅ។

ទីក្រុងដទៃទៀតរបស់អ៊ុយក្រែន រួមមាន Dnipro នៅភាគកណ្តាល, Lviv នៅភាគខាងលិច និង Kharkiv នៅភាគខាងកើត ជាដើម ក៏បានស្ថិតក្រោមការកំណត់គោលដៅវាយប្រហារ នៃមីស៉ីលរបស់រុស្ស៉ីដូចគ្នា។ អ្នកនាំពាក្យកងទ័ពអាកាសអ៊ុយក្រែន បានអះអាងថា វាគឺជាការវាយប្រហារដ៏ធំសម្បើមមួយ​របស់រុស្ស៉ី ដែលរួមមានការប្រើប្រាស់មីស៉ីលចម្រុះ រួមមានទាំងមីស៉ីលល្បឿនលឿនជាងសំឡេង មីស៉ីលគ្រូស និងមីស៉ីលបាលិស្ទីគ។ បើតាមប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី រុស្ស៉ីបានបាញ់មីស៉ីលសរុបប្រហែលជា ១១០គ្រាប់។

គួរបញ្ជាក់ថា ទីក្រុងកៀវបានព្យាយាមព្រមានជាច្រើនសប្តាហ៍មកហើយថា រុស្ស៉ីអាចកំពុងប្រមូលផ្តុំមីស៉ីល ដើម្បីបើកការវាយប្រហារជា​ទ្រង់ទ្រាយធំ មកលើគោលដៅបណ្តាញផ្គត់ផ្គង់ថាមពលរបស់អ៊ុយក្រែន។ កាលពីឆ្នាំ២០២២ ប្រជាជនអ៊ុយក្រែនរាប់លាននាក់ ត្រូវរស់នៅក្រោម​ស្ថានភាពងងឹត នៅពេលដែលរុស្ស៉ីបានសង្រ្គប់វាយប្រហារលើ ហេដ្ឋារចនាសម្ព័ន្ធថាមពលអគ្គិសនី។ ក្រសួងថាមពលអ៊ុយក្រែន បានរាយការណ៍ពីករណីដាច់ភ្លើង នៅតំបន់ចំនួន៤ ក្រោយការវាយប្រហាររបស់រុស្ស៉ី នាថ្ងៃសុក្រនេះ៕

រូបភាពពី Reuters