(ប៉េកាំង)៖ ក្រសួងការពារជាតិចិននៅថ្ងៃព្រហស្បតិ៍នេះ បានចោទប្រកាន់រដ្ឋាភិបាលតៃវ៉ាន់ថា មានចេតនាបំផុសបំផុល អំពីការគំរាមកំហែង​ផ្នែកយោធាពីសំណាក់ចិន ដើម្បីទាក់ទាញរកសំឡេងឆ្នោត មុនការបោះឆ្នោតជ្រើសរើសមេដឹកនាំអាណត្តិថ្មី របស់ដែនកោះមួយនេះ ដែលនឹងប្រព្រឹត្តទៅក្នុងពេលជាង ២សប្តាហ៍ទៀត។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃព្រហស្បតិ៍ ទី២៨ ខែធ្នូ ឆ្នាំ២០២៣។

ថ្លែងក្នុងសន្និសីទសារព័ត៌មាននៅទីក្រុងប៉េកាំង អ្នកនាំពាក្យក្រសួងការពារជាតិចិន លោក Wu Qian បាននិយាយថា រដ្ឋាភិបាលតៃវ៉ាន់ គឺជាមូលហេតុនៃការកើនឡើង នូវភាពតានតឹងរវាងភាគីទាំងពីរ។ លោក Wu បានលើកឡើងដូច្នេះថា «អាជ្ញាធរនៃគណបក្សកាន់អំណាច DPP កំពុងតែ​ខំប្រឹងបំប៉ោងដោយចេតនា អំពីអ្វីដែលពួកគេហៅថា «ការគំរាមកំហែងយោធា» ពីចិន ហើយនិយាយបំផ្លើសកម្រិតនៃភាពតានតឹង។ នេះគឺជាការប៉ុនប៉ងស្វែងរកផលប្រយោជន៍ សម្រាប់ការបោះឆ្នោតសុទ្ធសាធ»។

កាលពីថ្ងៃអង្គារសប្តាហ៍នេះ ក្រសួងការពារជាតិតៃវ៉ាន់ បាននិយាយថា ខ្លួនមើលមិនឃើញសញ្ញាណាមួយ នៃការត្រៀមធ្វើសកម្មភាពយោធាទ្រង់ទ្រាយធំរបស់ចិន នៅមុនការបោះឆ្នោតនាខែក្រោយនោះទេ ប៉ុន្តែនឹងមិនធ្វេសប្រហែសឡើយ គឺនឹងបន្តការឃ្លាំមើលឱ្យដិតដល់លើចិន។ អំលុងពេលប្រមាណជាង ១ឆ្នាំកន្លះមកនេះ ចិនធ្លាប់បានធ្វើសមយុទ្ធយោធាទ្រង់ទ្រាយធំ ចំនួន២លើក នៅក្បែរកោះតៃវ៉ាន់។ ក្នុងនោះមួយលើកធ្វើឡើង អំលុងទស្សនកិច្ចរបស់លោកស្រី Nancy Pelosi មកកាន់ទីក្រុងតៃប៉ិ កាលពីខែសីហា ឆ្នាំ២០២២ ខណៈ​កាលនោះ លោកស្រីគឺជាប្រធានសភាតំណាងរាស្រ្តអាមេរិក។ រីឯមួយលើកទៀតធ្វើឡើង អំលុងជំនួបនៅរដ្ឋ California នៃសហរដ្ឋអាមេរិក កាលពីខែមេសា ឆ្នាំនេះ រវាងមេដឹកនាំតៃវ៉ាន់ លោកស្រី Tsai Ing-wen ជាមួយលោក Kevin McCarthy ដែលពេលនោះ កាន់តំណែងជាប្រធានសភាតំណាងរាស្រ្តអាមេរិក បន្ទាប់ពីលោកស្រី Pelosi។

គួរបញ្ជាក់ថា តៃវ៉ាន់ត្រូវចិនចាត់ទុកជាផ្នែកមិនអាចកាត់ផ្តាច់បានដាច់ខាត នៃទឹកដីរបស់ខ្លួន។ ទីក្រុងប៉េកាំង មានការមិនពេញចិត្តនោះឡើយទាំងចំពោះបក្ស DPP និងចំពោះបេក្ខជនមេដឹកនាំតៃវ៉ាន់ថ្មីរបស់គណបក្សនេះ គឺមេដឹកនាំរងតៃវ៉ាន់បច្ចុប្បន្ន លោក Lai Ching-te ដែលកំពុងមានសំឡេងប្រជាប្រិយភាពនាំមុខគេ សម្រាប់ការបោះឆ្នោតនាដើមឆ្នាំក្រោយ។ តៃវ៉ាន់នឹងរៀបចំការបោះឆ្នោតជ្រើសរើសមេដឹកនាំ និងការបោះឆ្នោតសភាអាណត្តិថ្មី នាថ្ងៃទី១៣ ខែមករា ឆ្នាំ២០២៤៕

រូបភាពពី Reuters