(តៃប៉ិ)៖ ក្រសួងការពារជាតិតៃវ៉ាន់នាថ្ងៃអង្គារនេះ បាននិយាយថា តៃវ៉ាន់មើលមិនឃើញសញ្ញាណាមួយ នៃការត្រៀមធ្វើសកម្មភាពយោធាទ្រង់ទ្រាយធំរបស់ចិន នៅមុនការបោះឆ្នោតនាខែក្រោយនោះទេ ប៉ុន្តែមិនធ្វេសប្រហែសឡើយ គឺនឹងបន្តការឃ្លាំមើលឱ្យដិតដល់លើចិន។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃអង្គារ ទី២៦ ខែធ្នូ ឆ្នាំ២០២៣។

តៃវ៉ាន់នឹងរៀបចំការបោះឆ្នោតជ្រើសរើសមេដឹកនាំអាណត្តិថ្មី នៅថ្ងៃទី១៣ ខែមករា ឆ្នាំ២០២៤។ ស្របពេលដែលការបោះឆ្នោតកំពុងខិតកាន់តែកៀក តៃវ៉ាន់បានបន្តរាយការណ៍អំពីវត្តមានយន្តហោះនិងនាវាចម្បាំងចិន នៅក្បែរៗដែនកោះខ្លួន ព្រមទាំងបាឡុងមួយចំនួនផងដែរ ប៉ុន្តែបាឡុង​ទាំងនោះ ត្រូវបានយោធាតៃវ៉ាន់អះអាងថា ទំនងជាបាឡុងសម្រាប់វិស័យឧតុនិយម ដែលត្រូវបានខ្យល់ខ្លាំងបក់ឱ្យរសាត់។

នៅថ្ងៃអង្គារនេះ លោក Sun Li-fang អ្នកនាំពាក្យក្រសួងការពារជាតិតៃវ៉ាន់ បានប្រាប់ក្រុមអ្នកសារព័ត៌មាន នៅទីក្រុងតៃប៉ិ ដូច្នេះថា «មកទល់ពេលនេះ ពួកយើងមិនឃើញមានសញ្ញាដែលឱ្យតំរុយថា ចិនកំពុងត្រៀមធ្វើសកម្មភាពទ្រង់ទ្រាយធំណាមួយឡើយ។ ប៉ុន្តែខណៈពុំមានអ្វីកើតឡើងនាពេលនេះ មិនមែនមានន័យថា វានឹងគ្មានដូចគ្នានៅថ្ងៃស្អែក ឬក៏ខានស្អែកនោះទេ។ ដូច្នេះហើយ យើងកំពុងបន្តតាម​ឃ្លាំមើលជាប់ជានិច្ច»។

គួរបញ្ជាក់ថា អំលុងពេលប្រមាណជាង១ឆ្នាំកន្លះមកនេះ ចិនធ្លាប់បានធ្វើសមយុទ្ធយោធាទ្រង់ទ្រាយធំចំនួន២លើក នៅក្បែរកោះតៃវ៉ាន់។ ក្នុងនោះមួយលើកធ្វើឡើង អំលុងទស្សនកិច្ចរបស់លោកស្រី Nancy Pelosi មកកាន់ទីក្រុងតៃប៉ិ កាលពីខែសីហា ឆ្នាំ២០២២ ខណៈ​កាលនោះ លោកស្រីគឺជាប្រធានសភាតំណាងរាស្រ្តអាមេរិក។ រីឯមួយលើកទៀតធ្វើឡើង អំលុងជំនួបនៅរដ្ឋ California នៃសហរដ្ឋអាមេរិក កាលពីខែមេសា ឆ្នាំនេះ រវាងមេដឹកនាំតៃវ៉ាន់ លោកស្រី Tsai Ing-wen ជាមួយលោក Kevin McCarthy ដែលពេលនោះ កាន់តំណែងជាប្រធានសភាតំណាងរាស្រ្តអាមេរិក បន្ទាប់ពីលោកស្រី Pelosi៕

រូបភាពពី AFP