(ហ្សឺណេវ)៖ អង្គការសុខភាពពិភពលោក (WHO) បាននិយាយថា ខ្លួនបានដឹកនាំបេសកកម្មទៅកាន់មន្ទីរពេទ្យ ដែលមិនដំណើរការនៅភាគខាងជើងហ្គាហ្សាកាលពីចុងសប្តាហ៍នេះ ដោយពណ៌នាអំពីការកើនឡើងនៃភាពអស់សង្ឃឹម និងភាពអត់ឃ្លានកាន់តែខ្លាំងឡើង។ នេះបើយោងតាមាការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃទី២៥ ខែធ្នូ ឆ្នាំ២០២៣។

ប្រមុខ WHO លោក Tedros Adhanom Ghebreyesus បាននិយាយកាលពីល្ងាចថ្ងៃអាទិត្យ (២៤ ធ្នូ) នៅលើទំនាក់ទំនង X ដែលពីមុនត្រូវបានគេស្គាល់ថាជា Twitter ថា ទីភ្នាក់ងារសុខភាពអង្គការសហប្រជាជាតិ និងដៃគូរបស់ខ្លួនបានប្រគល់ជំនួយ រួមទាំងប្រេងឥន្ធនៈដល់មន្ទីរពេទ្យ Shifa ដែលត្រូវបានបំផ្លិចបំផ្លាញ ដែលធ្លាប់ជាមន្ទីរពេទ្យធំបំផុត និងទំនើបបំផុតនៅហ្គាហ្សា។

លោកបានព្រមានទៀតថា «អរិភាពដែលកំពុងបន្ត និងចំនួនអ្នករបួសជាច្រើនគឺលើសសមត្ថិភាពរបស់យើងជួយ»។ ប៉ុន្តែលោកបានសម្តែងក្តីសង្ឃឹមថា ការផ្តល់ប្រេងម៉ាស៊ីនចំនួន ១៩,២០០ លីត្រកាលពីថ្ងៃសៅរ៍ នឹងជួយធ្វើឱ្យសេវាសំខាន់ៗនៅមន្ទីរពេទ្យរស់ឡើងវិញ ដែលបច្ចុប្បន្នមានត្រឹមតែ «ផ្តល់សសង្គ្រោះបឋមបំផុតប៉ុណ្ណោះ»។ ប៉ុន្តែ​លោក​បាន​សង្កត់​ធ្ងន់​ថា «នឹង​ត្រូវ​ការ​ច្រើន​ទៀត»។

ប្រមុខ WHO រូបនេះបាននិយាយទៀតថា អ្វីដែលអ្នកចូលរួមក្នុងបេសកកម្មថ្ងៃទី ២៣ ខែធ្នូបានធ្វើជាសាក្សីគឺថា «ការកើនឡើងនៃភាពអស់សង្ឃឹម ដោយសារតែភាពអត់ឃ្លានធ្ងន់ធ្ងរ» ដោយលោកបានទំពាវនាវមានការបង្កើនការផ្តល់ជំនួយជាបន្ទាន់នូវស្បៀងអាហារ និងទឹក ដើម្បីធានាបាននូវសុខភាព និងស្ថិរភាពរបស់ប្រជាជន។

គួរបញ្ជាក់ថា សង្រ្គាមបានផ្ទុះឡើងបន្ទាប់ពីក្រុមយុទ្ធជនហាម៉ាស់ បានវាយប្រហារភាគខាងត្បូងអ៊ីស្រាអែលកាលពីថ្ងៃទី ៧ ខែតុលា ដោយបានសម្លាប់មនុស្សប្រហែល ១,១៤០ នាក់ និងចាប់ចំណាប់ខ្មាំងចំនួន ២៥០ នាក់ នេះបើយោងតាមការបូកសរុបរបស់ AFP ដោយផ្អែកលើទិន្នន័យរបស់អ៊ីស្រាអែល។ អ៊ីស្រាអែលបានឆ្លើយតបជាមួយនឹងយុទ្ធនាការយោធាឥតឈប់ឈរ ដែលបានសម្លាប់មនុស្សជាង ២០,៤០០ នាក់ ដែលភាគច្រើនជាស្ត្រី និងកុមារ៕

រូបភាពពី AFP