(គែរ)៖ សហរដ្ឋអាមេរិកបានឱ្យដឹងថា កាលពីថ្ងៃសៅរ៍សប្តាហ៍នេះ កប៉ាល់ពាណិជ្ជកម្ម២គ្រឿង នៅឯសមុទ្រក្រហម និង១គ្រឿងទៀតនៅ​មហាសមុទ្រឥណ្ឌា ពុំឆ្ងាយប៉ុន្មានពីឆ្នេរប្រទេសឥណ្ឌា បានស្ថិតក្រោមការវាយប្រហារពីយន្តហោះដ្រូន។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃអាទិត្យ ទី២៤ ខែធ្នូ ឆ្នាំ២០២៣។

យោធាអាមេរិកបានឱ្យដឹងថា នាវាចម្បាំងខ្លួន១គ្រឿង បានឆ្លើយតបចំពោះការស្វែងរកជំនួយពីកប៉ាល់២គ្រឿង ដែលរងការវាយប្រហារ។ កប៉ាល់ដឹកប្រេង១គ្រឿង ដែលចងទង់ជាតិន័រវែស ព្រមទាំងជាកម្មសិទ្ធិ និងធ្វើប្រតិបត្តិការដោយន័រវែសផ្ទាល់ រួមជាមួយកប៉ាល់ដឹកប្រេង១គ្រឿងទៀត ដែលចងទង់ជាតិឥណ្ឌា បានរងការវាយប្រហារពីយន្តហោះដ្រូន ដែលបាញ់ចេញមកពីតំបន់ទឹកដីរបស់ប្រទេសយេម៉ែន ដែលកាន់កាប់ដោយក្រុមឧទ្ទាមហ៊ូទី។

អំលុងពេលឆ្លើយតបចំពោះការសុំជំនួយនោះ នាវាចម្បាំងអាមេរិក បានបាញ់ទម្លាក់ដ្រូន៤គ្រឿង។ បើតាមយោធាអាមេរិក វាគឺជាសកម្មភាព​វាយប្រហារលើកទី១៤និងទី១៥ហើយ របស់ក្រុមហ៊ូទីលើកប៉ាល់ពាណិជ្ជកម្ម គិតចាប់តាំងពីថ្ងៃទី១៧ ខែតុលាមក។ រីឯមន្ទីរបញ្ចកោណបានឱ្យដឹងថា កប៉ាល់ដឹកសារធាតុគីមី១គ្រឿងនៅមហាសមុទ្រឥណ្ឌា ចម្ងាយប្រហែល៣៧០គីឡូម៉ែត្រពីឆ្នេរប្រទេសឥណ្ឌា ក៏បានស្ថិត​ក្រោមការវាយប្រហារ ពីយន្តហោះដ្រូនផងដែរ ប៉ុន្តែដ្រូននោះបាញ់ចេញពីមកពីប្រទេសអ៉ីរ៉ង់។ បើតាមមន្ទីរបញ្ចកោណ ការវាយប្រហារ​នោះ គឺជាលើកទី៦ របស់អ៉ីរ៉ង់ទៅលើកប៉ាល់ពាណិជ្ជកម្ម គិតចាប់តាំងពីឆ្នាំ២០២១។ យ៉ាងណាក្តី ពុំមានសេចក្តីរាយការណ៍ អំពីមនុស្ស​រងគ្រោះថ្នាក់ ក្នុងការវាយប្រហារទាំងនេះ កាលពីថ្ងៃសៅរ៍ឡើយ។

គួរបញ្ជាក់ថា ក្រុមហ៊ូទីដែលជាសម្ព័ន្ធមិត្តអ៉ីរ៉ង់ និងកាន់កាប់ទឹកដីភាគច្រើននៃប្រទេសយេម៉ែន បានបង្កការរំខានចំពោះ ការពាណិជ្ជកម្ម​តាមដែនសមុទ្ររបស់ពិភពលោក អស់រយៈពេលប៉ុន្មានសប្តាហ៍មកហើយ តាមរយៈការវាយប្រហារលើកប៉ាល់នានា ដែលបើកឆ្លងកាត់​ច្រកសមុទ្រ Bab al-Mandab ដែលស្ថិតនៅចុងភាគខាងត្បូងនៃសមុទ្រក្រហម ដើម្បីឆ្លើយតបចំពោះការធ្វើសង្រ្គាមដ៏បង្ហូរឈាម​របស់អ៉ីស្រាអែល នៅតំបន់ Gaza។ ចំណែក រដ្ឋាភិបាលអ៉ីរ៉ង់ ក៏បានរិះគន់ម្តងហើយម្តងទៀត ចំពោះសង្រ្គាមអ៉ីស្រាអែលផងដែរ៕

រូបភាពពី AFP