(មូស្គូ)៖ វិមានក្រឹមឡាំងនាថ្ងៃអង្គារនេះបានឱ្យដឹងថា ប្រធានាធិបតីរុស្ស៉ី លោក វ៉្លាឌីមៀ ពូទីន បានផ្ញើសារបង្ហាញការចូលរួមរំលែកទុក្ខយ៉ាងជ្រាលជ្រៅ ទៅកាន់ប្រធានាធិបតីចិន លោក ស៉ី ជីនពីង បន្ទាប់ពីគ្រោះរញ្ជួយដីមួយ បានសម្លាប់មនុស្សយ៉ាងហោច១១៨នាក់ តំបន់ភាគពាយព្យ​នៃប្រទេសចិន។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃអង្គារ ទី១៩ ខែធ្នូ ឆ្នាំ២០២៣។

យោងតាមសេចក្តីថ្លែងការណ៍របស់វិមានក្រឹមឡាំង លោកប្រធានាធិបតីរុស្ស៉ី បាននិយាយក្នុងសារផ្ញើទៅកាន់លោកប្រធានាធិបតីចិន យ៉ាងដូច្នេះថា «នៅប្រទេសរុស្ស៉ី ពួកយើងសូមសម្តែងការចូលរួមរំលែកទុក្ខ ដល់អ្នកទាំងឡាយដែលត្រូវរងក្តីឈឺចាប់ដោយសារ ការបាត់បង់មនុស្សជាទីស្រឡាញ់ នៅក្នុងគ្រោះមហន្តរាយរញ្ជួយដីនេះ ហើយសង្ឃឹមថា អ្នកដែលរងរបួសទាំងអស់ នឹងឆាប់បានជាសះស្បើយឡើងវិញ»។

គួរបញ្ជាក់ថា បើតាមតួលេខចុងក្រោយបំផុត មនុស្សចំនួន១០៥នាក់ បានបាត់បង់ជីវិតនៅខេត្ត Gansu និង៣៩៧នាក់រងរបួស ខណៈនៅឯ​ខេត្ត Qinghai មានមនុស្ស១៣នាក់ស្លាប់ និង១៨២នាក់រងរបួស។ ជាមួយគ្នានេះ មនុស្ស២០នាក់ផ្សេងទៀត ក៏បានបាត់ខ្លួនផងដែរ។ គ្រោះរញ្ជួយដីខាងលើមានកម្រិត៦.២រ៉ិចទ័រ។ គ្រោះរញ្ជួយដីតែងតែកើតឡើងជារឿយៗ នៅតាមបណ្ដាខេត្តស្ថិតនៅភាគពាយព្យប្រទេសចិន តួយ៉ាងដូចជាខេត្ត Gansu ហើយគ្រោះរញ្ជួយដីមួយ ដែលផ្ដាច់ជីវិតមនុស្សច្រើនបំផុតនៅចិន ក្នុងរយៈប៉ុន្មានទសវត្សរ៍ថ្មីៗនេះ នោះគឺរញ្ជួយដីកម្រិត ៨.០រ៉ិចទ័រ ដែលបានវាយប្រហារលើខេត្ត Sichuan កាលពីឆ្នាំ២០០៨ សម្លាប់មនុស្សជិត ៧០,០០០នាក់៕

រូបភាពពី Xinhua