(បាងកក)៖ យោធាថៃបានឱ្យដឹងនៅថ្ងៃចន្ទនេះថា កងកម្លាំងរបស់ខ្លួនបានផ្តាច់ជីវិត ក្រុមជនសង្ស័យរត់ពន្ធគ្រឿងញៀនចំនួន១៥នាក់ ក្នុងការបាញ់ប្រយុទ្ធតតាំងគ្នាមួយ នៅឯតំបន់ភាគខាងជើងប្រទេស ក្បែរព្រំប្រទល់មីយ៉ាន់ម៉ា។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃចន្ទ ទី១៨ ខែធ្នូ ឆ្នាំ២០២៣។

ការផ្ទុះអាវុធដាក់គ្នាខាងលើបានកើតឡើង កាលពីយប់ថ្ងៃសៅរ៍ចុងសប្តាហ៍កន្លងទៅនេះ ក្នុងសង្កាត់ Mae Fah Luang នៃខេត្ត Chiang Rai កៀកនឹងតំបន់គេហៅថា «តំបន់ត្រីកោណមាស» ដែលជាចំណុចប្រសព្វរវាងប្រទេសថៃ មីយ៉ាន់ម៉ា និងឡាវ និងត្រូវគេស្គាល់ជា កន្លែងពោរពេញ​ទៅដោយសកម្មភាពរត់ពន្ធគ្រឿងញៀន យូរមកហើយ។ ក្រោយការប្រយុទ្ធគ្នា កងកម្លាំងទាហានថៃ បានរកឃើញថង់ធំៗចំនួន១៧ថង់ ដែលផ្ទុកថ្នាំញៀនប្រភេទអំហ្វេតាមីន (amphetamine) សរុបជាង២លានគ្រាប់។ អាជ្ញាធរថៃ ពុំទាន់អាចកំណត់អត្តសញ្ញណច្បាស់ថា ជនសង្ស័យទាំង១៥នាក់នោះ ជាជនជាតិថៃទាំងអស់ឬក៏យ៉ាងណា នៅឡើយទេ។

គួរបញ្ជាក់ថា មីយ៉ាន់ម៉ាជាប្រទេសធំមួយ ខាងផលិតថ្នាំញៀនប្រភេទអំហ្វេតាមីនខាងលើ ហើយភាគច្រើននៃថ្នាំទាំងនោះ ត្រូវបានលួចដឹកជញ្ជូន​ឆ្លងកាត់តាមប្រទេសថៃនិងឡាវ។ កាលពីខែកញ្ញា ឆ្នាំនេះ ជនរត់ពន្ធគ្រឿងញៀនម្នាក់ និងមន្រ្តីប៉ូលិសថៃម្នាក់ បានបាត់បង់ជីវិត ក្នុងការ​ប៉ះទង្គិចគ្នា ខណៈកាលពីមួយឆ្នាំមុន ជនសង្ស័យ១៥នាក់ ត្រូវបានបាញ់ស្លាប់ ដោយយោធាថៃ នៅខេត្ត Chiang Rai អំលុងពេលដែលពួកគេ​ព្យាយាមឆ្លងព្រំដែនដោយថ្មើរជើង៕

រូបភាពពី AFP