(បាងកក)៖ មេដឹកនាំគណបក្ស Move Forward នៅប្រទេសថៃ បានឱ្យដឹងថា នៅថ្ងៃពុធនេះ តុលាការថៃបានសម្រេចផ្តន្ទាទោសលើ ​សមាជិកសភាម្នាក់មកពីបក្សរបស់ខ្លួន ឱ្យជាប់ពន្ធនាគាររយៈពេលសរុប៦ឆ្នាំ ពាក់ព័ន្ធការប្រមាថព្រះមហាក្សត្រ និងបទល្មើសផ្សេងទៀត។ នេះបើតាមការចេញផ្សាយដោយ ទីភ្នាក់ងារព័ត៌មាន ​AFP នាថ្ងៃពុធ ទី១៣ ខែធ្នូ ឆ្នាំ២០២៣។

មេដឹកនាំគណបក្ស Move Forward លោក Chaithawat Tulathon បានប្រាប់ AFP ថា សមាជិកសភាខាងលើ គឺអ្នកនាង Rakchanok Srinork ត្រូវតុលាការរកឃើញថា មានទោសពីបទប្រមាថព្រះមហាក្សត្រ និងបំពានច្បាប់ប្រឆាំងឧក្រិដ្ឋកម្មកុំព្យូទ័រ ដោយសារការបង្ហោះសារចំនួន២ នៅលើបណ្តាញសង្គម X (Twitter)។ បើតាមលោក Chaithawat អ្នកនាង Rakchanok ត្រូវបានកាត់ទោសជាប់ពន្ធនាគារ រយៈពេល៣ឆ្នាំ ក្រោមច្បាប់ប្រមាថព្រះមហាក្សត្រ និង៣ឆ្នាំទៀត ក្រោមច្បាប់ឧក្រិដ្ឋកម្មកុំព្យូទ័រ។

គួរបញ្ជាក់ថា សមាជិកសភាថៃវ័យ២៩ឆ្នាំរូបនេះ បានដាក់សំណើសុំនៅក្រៅឃុំ និងផ្តល់ប្រាក់ចំនួន៣០០,០០០បាត ស្មើនឹង៨,៥០០ដុល្លារ ធ្វើជាការធានា។ តុលាការត្រូវគេរំពឹងថា នឹងធ្វើការសម្រេចលើសំណើនោះ ក្នុងថ្ងៃពុធដដែលនេះ ប៉ុន្តែប្រសិនបើមិនទទួលជោគជ័យ អ្នកនាង Rakchanok នឹងត្រូវដកតំណែងជា តំណាងរាស្រ្តដោយស្វ័យប្រវត្តិ៕

រូបភាពពី Instagram