(តូក្យូ)៖ ប្រព័ន្ធផ្សព្វផ្សាយជប៉ុន ​Asahi បានរាយការណ៍នៅថ្ងៃអាទិត្យនេះថា នាយករដ្ឋមន្រ្តីជប៉ុន លោក Fumio Kishida គ្រោងធ្វើការផ្លាស់ប្តូរនៅក្នុងគណៈរដ្ឋមន្រ្តី ក៏ដូចជាគណបក្សកាន់អំណាច ក្រោយលេចធ្លាយរឿងអាស្រូវថា មន្រ្តីនិងសមាជិកបក្ស ទទួលបានមូលនិធិនយោបាយរាប់សិបម៉ឺនដុល្លារ ដែលមិនត្រូវបានប្រកាសត្រឹមត្រូវ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នៅថ្ងៃអាទិត្យ ទី១០ ខែធ្នូ ឆ្នាំ២០២៣។

យោងតាមសារព័ត៌មាន Asahi ប្រធានលេខាធិកានៃរគណៈរដ្ឋមន្រ្តីជប៉ុន លោក Hirokazu Matsuno ដែលជាអ្នកនាំពាក្យជាន់ខ្ពស់របស់​រដ្ឋាភិបាលជប៉ុន, រដ្ឋមន្រ្តីឧស្សាហកម្ម លោក Yasutoshi Nishimura និងប្រធានគោលនយោបាយរបស់បក្សកាន់អំណាច LDP លោក Koichi Hagiuda នឹងត្រូវជំនួសតំណែង ដ្បិតពួកគេស្ថិតក្នុងចំណោមក្រុមបុគ្គល ដែលជាប់សង្ស័យពីការពុំបានប្រកាស​មូលនិធិនយោបាយត្រឹមត្រូវ។ សារព័ត៌មានជប៉ុនមួយទៀតគឺ Mainichi ក៏បានរាយការណ៍ក្នុងថ្ងៃដដែលនេះដែរថា អ្នកទាំង៣ នឹងត្រូវជំនួសតំណែង។

គួរបញ្ជាក់ថា លោក Kishida និងគណបក្សរបស់លោក កំពុងប្រឈមការរិះគន់ ក្រោយមានការចោទប្រកាន់ថា មន្រ្តីនិងសមាជិកបក្ស​មួយចំនួន ទំនងជាទទួលបានលុយរៃអង្គាសនយោបាយ ចំនួនជាង ៦៩៣,០០០ដុល្លារ ដែលមិនត្រូវបានប្រកាសត្រឹមត្រូវជាសាធារណៈ​នោះឡើយ។ ប្រជាប្រិយភាពសម្រាប់រដ្ឋាភិបាលលោក Kishida បានធ្លាក់ចុះដល់កម្រិតដ៏ទាបខ្លាំងមួយ ដែលហេតុផលមួយផ្នែកគឺដោយសារតែ ប្រជាជនជប៉ុនព្រួយបារម្ភអំពី ការកើនឡើងនៃការចំណាយសម្រាប់ជីវភាពរស់នៅ ហើយនិងគម្រោងដំឡើងការយកពន្ធ៕

រូបភាពពី Reuters