(ម៉ានីល)៖ កាលពីថ្ងៃសុក្រសប្តាហ៍នេះ ហ្វីលីពីនបានឱ្យដឹងថា កំពុងតែបង្កើតស្ថានីយឆ្មាំសមុទ្រមួយ នៅលើកោះធំបំផុតជាងគេ ដែលខ្លួនគ្រប់គ្រងនៅតំបន់​មានបញ្ហាវិវាទក្នុងសមុទ្រចិនខាងត្បូង ក្រោមគោលបំណងធ្វើឱ្យប្រសើរឡើង នូវការឃ្លាំមើលសកម្មភាពនាវារបស់ចិន។ នេះបើតាមការចេញផ្សាយដោយ ទីភ្នាក់ងារព័ត៌មាន ​AFP នៅថ្ងៃសៅរ៍ ទី២ ខែធ្នូ ឆ្នាំ២០២៣។

ទីប្រឹក្សាសន្តិសុខជាតិហ្វីលីពីន លោក Eduardo Ano បានប្រកាសឱ្យដឹងដូចខាងលើ អំលុងដំណើរទស្សនកិច្ចទៅកាន់កោះគ្រប់គ្រង​ដោយហ្វីលីពីន ឈ្មោះ Thitu ដែលជាផ្នែកនៃទីប្រជុំកោះមានជម្លោះ Spratly។ បើតាមលោក Ano ស្ថានីយឆ្មាំសមុទ្រនោះនឹងបំពាក់​ជាមួយប្រព័ន្ធទំនើបៗ ដែលរួមមានទាំងរ៉ាដា ឧបករណ៍ទាក់ទងដោយប្រើផ្កាយរណប កាមេរ៉ាតាមដាន និងប្រព័ន្ធគ្រប់គ្រងចរចារណ៍នាវា ហើយវាត្រូវបានរំពឹងថា នឹងអាចចាប់ផ្តើមធ្វើប្រតិបត្តិការបាន នៅអំលុងដើមឆ្នាំ២០២៤។

លោកទីប្រឹក្សាសន្តិសុខជាតិហ្វីលីពីន បានលើកឡើងយ៉ាងដូច្នេះថា «ប្រព័ន្ធទាំងនេះនឹងជួយពង្រឹងជាខ្លាំង នូវសមត្ថភាពឆ្មាំសមុទ្រយើង ពាក់ព័ន្ធការងារឃ្លាំមើលសកម្មភាពកងកម្លាំងដែនសមុទ្រចិន ក៏ដូចជាប្រទេសដទៃទៀត ដែលអាចមកធ្វើសកម្មភាពនៅទីនេះ ព្រមទាំង​សកម្មភាពរបស់នាវានិងយន្តហោះរបស់ពួកយើងផ្ទាល់»។ កោះ Thitu ស្ថិតនៅចម្ងាយ៤៣០គីឡូម៉ែត្រ ពីកោះ Palawan របស់ហ្វីលីពីន និងចម្ងាយ៩០០គីឡូម៉ែត្រពីកោះ Hainan របស់ចិន។

គួរបញ្ជាក់ថា ទំនាក់ទំនងរវាងទីក្រុងម៉ានីលនិងទីក្រុងប៉េកាំង បានធ្លាក់ទៅក្នុងភាពរកាំរកូសខ្លាំង ក្នុងពេលប៉ុន្មានខែចុងក្រោយនេះ ជុំវិញ​ឧប្បត្តិហេតុប្រឈមមុខគ្នាជាបន្តបន្ទាប់ នៅតំបន់ជម្លោះក្នុងសមុទ្រចិនខាងត្បូង ដោយក្នុងនោះរួមមានទាំងការប៉ះគ្នា២ករណី​ផងដែរ រវាងទូកនិងនាវារបស់ហ្វីលីពីននិងចិន ហើយប្រទេសទាំងពីរ បានទម្លាក់កំហុសដាក់គ្នាទៅវិញទៅមក៕

រូបភាពពី Reuters