(សេអ៊ូល)៖ ប្រព័ន្ធផ្សព្វផ្សាយកូរ៉េខាងត្បូង Yonhap បានរាយការណ៍ថា នៅថ្ងៃអាទិត្យនេះ ប្រធានទីភ្នាក់ងារចារកម្មប្រទេសកូរ៉េខាងត្បូង បានសម្រេចចុះចេញពីតួនាទី ចំពោះមុខការកើនឡើងនៃភាពតានតឹង ជុំវិញកម្មវិធីអាវុធនុយក្លេអ៊ែរនិងមីស៉ីលបាលិស្ទីគ នៃប្រទេសជិតខាងគឺកូរ៉េខាងជើង។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃអាទិត្យ ទី២៦ ខែវិច្ឆិកា ឆ្នាំ២០២៣។

Yonhap បានរាយការណ៍ថា ប្រធានាធិបតីកូរ៉េខាងត្បូង លោក ​Yoon Suk Yeol បានទទួលយកការលាលែងពីមុខតំណែងរបស់ លោក Kim Kyou Hyun ដែលមានតួនាទីជា នាយកបណ្តាញស៉ើបការណ៍សម្ងាត់ជាតិ ប៉ុន្តែមិនបានបញ្ជាក់ពីហេតុផលឬខ្លឹមសារលម្អិតអ្វីឡើយ ខណៈ​ Yonhap បានបន្ថែមថា មន្រ្តីជាន់ខ្ពស់២រូបទៀតនៃទីភ្នាក់ងារចារកម្មនេះ ក៏បានលាលែងពីតំណែងផងដែរ។ យោងតាមប្រព័ន្ធផ្សព្វផ្សាយ​ក្នុងស្រុកកូរ៉េខាងត្បូង ការចុះចេញពីតំណែងទាំងនេះ ទំនងជាពាក់ព័ន្ធទៅនឹងបញ្ហានៃការគ្រប់គ្រងបុគ្គលិក ដែលបានលេចឡើងនៅ​ក្នុងទីភ្នាក់ងារចារកម្មកូរ៉េខាងត្បូង តាំងតែពីខែមិថុនា ឆ្នាំនេះ។

គួរបញ្ជាក់ថា លោក Kim Kyou Hyun ដែលជាអតីតទីប្រឹក្សាសន្តិសុខជាតិនិងជាអ្នកការទូតអាជីព ត្រូវបានតែងតាំងឱ្យកាន់តំណែងជា ប្រមុខចារកម្មកូរ៉េខាងត្បូងកាលពីខែឧសភា ឆ្នាំ២០២២ ក្រោយជ័យជម្នះរបស់លោក Yoon ក្នុងការបោះឆ្នោតជ្រើសរើសប្រធានាធិបតី។ ស្ថានការណ៍វិវត្តន៍នេះ គឺចំពេលដែលកូរ៉េខាងជើង កំពុងតែប្រឹងប្រែងពន្លឿនការអភិវឌ្ឍកម្មវិធីសព្វាវុធរបស់ខ្លួន ហើយនៅក្នុងសប្តាហ៍នេះ ទើបតែទទួលជោគជ័យ ក្នុងការនាំយកផ្កាយរណបស៉ើបការណ៍ដំបូងបំផុតរបស់ខ្លួន ទៅដាក់នៅគន្លងទីអវកាស៕

រូបភាពពី AFP