(ហ្វេសប៊ែង)៖ ប្រភពពីមន្រ្តីប៉ាឡេស្ទីន បានឱ្យដឹងថា កងកម្លាំងអ៉ីស្រាអែល បានសម្លាប់ជនជាតិប៉ាឡេស្ទីនចំនួន៧នាក់ ក្នុងនោះរួមមាន​អនីតិជន២នាក់ និងខ្មាន់កាំភ្លើងយ៉ាងហោចម្នាក់ នៅឯតំបន់ West Bank កាលពីចន្លោះយប់ថ្ងៃសៅរ៍-អាទិត្យសប្តាហ៍នេះ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នៅថ្ងៃអាទិត្យ ទី២៦ ខែវិច្ឆិកា ឆ្នាំ២០២៣។

ករណីអ្នកស្លាប់៥នាក់ ក្នុងចំណោមនោះ បានកើតឡើងនៅទីក្រុង Jenin ជាទីដែលយោធាអ៉ីស្រាអែលអះអាងថា កងកម្លាំងរបស់ខ្លួនបានធ្វើសកម្មភាពវាយឆ្មក់ ដើម្បីឃាត់ខ្លួនជនជាតិប៉ាឡេស្ទីនម្នាក់ ដែលជាប់សង្ស័យពាក់ព័ន្ធ​ក្នុងករណីឆ្មក់វាយប្រហារមួយនៅ West Bank ដែលបណ្តាលឱ្យមានមនុស្សស្លាប់ កាលពីខែសីហា ឆ្នាំនេះ។ យោធាអ៉ីស្រាអែល មិនបានបកស្រាយលម្អិតអំពីឧប្បត្តិហេតុនៅទីក្រុង Jenin នោះទេ ខណៈសាក្សីបានអះអាងថា វាគឺជាការប៉ះទង្គិចគ្នារវាងក្រុមខ្មាន់កាំភ្លើងប៉ាឡេស្ទីន និងកងកម្លាំងអ៉ីស្រាអែល។

រីឯករណីអ្នកស្លាប់ទី៦ គឺស្ថិតនៅភូមិ Yatma ក្បែរទីក្រុង Nablus និងម្នាក់ទៀតនៅក្បែរ កន្លែងតាំងទីលំនៅរបស់ក្រុមជនជាតិជ្វីហ្វ នៅជាយក្រុង El Bireh។ ខាងយោធាអ៉ីស្រាអែល មិនបានធ្វើការអត្ថាធិប្បាយ ជុំវិញឧប្បត្តិហេតុនៅទីតាំងទាំង២នេះទេ។ អាជ្ញាធរសុខាភិបាលបានឱ្យដឹងថា ជនជាតិប៉ាឡេស្ទីន៦នាក់ផ្សេងទៀត ក៏បានរងរបួសផងដែរ អំលុងការប៉ះទង្គិចគ្នានៅទីក្រុង Jenin។

គួរបញ្ជាក់ថា តំបន់ West Bank បានមើលឃើញការកើនឡើងអំពើហិង្សា ចាប់តាំងតែពីព្រឹត្តិការណ៍ថ្ងៃទី៧ ខែតុលា ជាពេលដែល​ក្រុមសកម្មប្រយុទ្ធប៉ាឡេស្ទីន នៃតំបន់ Gaza Strip បានសម្រុកចូលវាយប្រហារអ៉ីស្រាអែល ដោយបានផ្តាច់ជីវិតមនុស្ស១,២០០នាក់ ហើយប្រហែល២៤០នាក់ផ្សេងទៀត ត្រូវបានពួកគេចាប់យកធ្វើជាចំណាប់ខ្មាំង។ រីឯការធ្វើសង្រ្គាមសងសឹកវិញរបស់អ៉ីស្រាអែល បានសម្លាប់មនុស្សកើន​ជិតដល់១៥,០០០នាក់ នៅតំបន់ Gaza។ យោងតាមក្រសួងសុខាភិបាលនៃអាជ្ញាធរប៉ាឡេស្ទីន សរុបមកអំលុងសង្រ្គាមអ៉ីស្រាអែល-ហាម៉ាស គឺជនជាតិប៉ាឡេស្ទីនសរុបយ៉ាងហោច២៣០នាក់ នៅតំបន់ West Bank ត្រូវបានសម្លាប់ដោយនិគមជន និងទាហានអ៉ីស្រាអែល៕

រូបភាពពី AFP