(កៀវ)៖ ក្នុងកិច្ចប្រជុំអន្តរជាតិមួយស្តីពីបញ្ហាសន្តិសុខស្បៀង ដែលប្រព្រឹត្តទៅនៅទីក្រុងកៀវ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី កាលពីថ្ងៃសៅរ៍សប្តាហ៍នេះ បានលើកឡើងថា អ៊ុយក្រែនត្រូវការ ប្រព័ន្ធការពារដែនអាកាសបន្ថែម ដើម្បីការពារច្រកផ្លូវ​នាំចេញគ្រាប់ធញ្ញជាតិរបស់ខ្លួន ក៏ដូចជាដើម្បីការពារតំបន់ដែលនៅក្បែររុស្ស៉ី។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នៅថ្ងៃអាទិត្យ ទី២៦ ខែវិច្ឆិកា ឆ្នាំ២០២៣។

អំលុងកិច្ចប្រជុំ Grain from Ukraine ដែលមានការចូលរួមពីសំណាក់ក្រុមមន្រ្តីជាន់ខ្ពស់ និងថ្នាក់ដឹកនាំមកពីបណ្តាប្រទេសអឺរ៉ុប ដូចជាប្រធានាធិបតីស្វីស លោក Alain Berset និងនាយករដ្ឋមន្រ្តីលីទុយអានី លោកស្រី Ingrida Simonyte ជាដើម លោក ហ្សេលេនស្គី បាននិយាយដូច្នេះថា «បច្ចុប្បន្នគឺមានការខ្វះខាតនៃប្រព័ន្ធការពារដែនអាកាស ហើយវាគឺជាបញ្ហាជាក់ស្តែង»។

លោកប្រធានាធិបតីអ៊ុយក្រែន បានបន្តថា ទីក្រុងកៀវសង្ឃឹមនឹងអាចដោះស្រាយ បញ្ហាខ្វះខាតប្រព័ន្ធការពារដែនអាកាស តាមរយៈការជួយ​ផ្គត់ផ្គង់ថ្មីៗពីសំណាក់ដៃគូ និងការបង្កើនសមត្ថភាពផលិតដោយខ្លួនឯង។ កាលពីថ្ងៃសៅរ៍ រុស្ស៉ីបានបើកការវាយប្រហារដោយដ្រូនចំនួន​៧៥គ្រឿង មកលើរដ្ឋធានីរបស់អ៊ុយក្រែននិងតំបន់ជុំវិញ ដែលជាការវាយប្រហារធំបំផុតរបស់រុស្ស៉ី ដោយប្រើប្រាស់យន្តហោះដ្រូន គិតចាប់តាំងពីសង្រ្គាមផ្ទុះឡើង កាលពីខែកុម្ភៈ ឆ្នាំ២០២២។

គួរបញ្ជាក់ថា អ៊ុយក្រែនដែលជាប្រទេសនាំចេញដ៏សំខាន់មួយនៃធញ្ញជាតិ​ បាននិងកំពុងនាំចេញផលិតផលកសិកម្មរបស់ខ្លួន តាមរយៈ​ច្រករបៀងលក្ខណៈឯកតោភាគី កាត់សមុទ្រខ្មៅ បន្ទាប់ពីរុស្ស៉ីបានដកខ្លួនកាលពីខែកក្កដា ឆ្នាំនេះ ចេញពីកិច្ចព្រមព្រៀងសម្រប​សម្រួលដោយអង្គការសហប្រជាជាតិ ដែលអនុញ្ញាតឱ្យមានការដឹកជញ្ជូនធញ្ញជាតិអ៊ុយក្រែន តាមតំបន់សមុទ្រនោះដោយសុវត្ថិភាព៕

រូបភាពពី Reuters