(អ៉ីស្លាម៉ាបាដ)៖ អាជ្ញាធរប៉ាគីស្ថាន បានឱ្យដឹងថា មនុស្សយ៉ាងហោច១១នាក់បានបាត់បង់ជីវិត និង៣៥នាក់ផ្សេងទៀតបានទទួលរងរបួស កាលពីថ្ងៃសៅរ៍ចុងសប្តាហ៍នេះ ដោយសារហេតុការណ៍ភ្លើងឆេះផ្សារទំនើបមួយកន្លែង នៅទីក្រុង Karachi។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃអាទិត្យ ទី២៦ ខែវិច្ឆិកា ឆ្នាំ២០២៣។

មានមនុស្សសរុបជាង៦០នាក់ ស្ថិតក្នុងផ្សារទំនើបខាងលើ នៅពេលអគ្គិភ័យបានចាប់ផ្តើមឆាបឆេះ នៅជាន់ទី៤ នៃអគារដែលមានកម្ពស់៦ជាន់នោះ នៅទីក្រុង Karachi ភាគខាងត្បូងប្រទេសប៉ាគីស្ថាន។ ក្រុមភ្នាក់ងារសង្រ្គោះបន្ទាន់ បានរកឃើញនិងយកបានសាកសកមនុស្ស១១នាក់ ខណៈមនុស្ស៣៥នាក់ទៀតបានរងរបួស ក្នុងនោះ៧នាក់ស្ថិតក្នុងស្ថានភាពធ្ងន់ធ្ងរ។ បើតាមអាជ្ញាធសុខាភិបាលប៉ាគីស្ថាន អគ្គិភ័យត្រូវបាន​បង្កឡើងដោយការឆ្លងចរន្តអគ្គិភ័យ ហើយវាបានឆេះរាលដាលនៅ២ជាន់ នៃអគារផ្សារទំនើបនោះ។

គួរបញ្ជាក់ថា កាលពីឆ្នាំ២០១២ កម្មករយ៉ាងហោចរហូតដល់២៥០នាក់ បានស្លាប់នៅឯរោងចក្រកាត់ដេរមួយកន្លែង នៃតំបន់ភាគខាងលិច​ទីក្រុង Karachi ដោយសារតែភ្លើងឆាបឆេះ។ អគាររោងចក្រនោះ គឺពុំមានច្រកចេញបន្ទាន់ នៅពេលមានគ្រោះអគ្គិភ័យទេ៕

រូបភាពពី Reuters