(ប៉េកាំង)៖ កាលពីថ្ងៃព្រហស្បតិ៍ យោធាចិនបាននិយាយថា ហ្វីលីពីនបាននាំកម្លាំងបរទេសខាងក្រៅ មកល្បាតសមុទ្រចិនខាងត្បូងដើម្បីបង្កបញ្ហា បន្ទាប់ពីទីក្រុងម៉ានីល បានចាប់ផ្តើមកម្មវិធីប្រតិបត្តិការល្បាតដែនសមុទ្រនិងអាកាសរួមគ្នា ក្នុងសប្តាហ៍នេះ​ជាមួយសហរដ្ឋអាមេរិក។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នៅថ្ងៃសុក្រ ទី២៤ ខែវិច្ឆិកា ឆ្នាំ២០២៣។

យោធាចិនបានចោទប្រកាន់ហ្វីលីពីនយ៉ាងដូច្នេះថា «ហ្វីលីពីនបាននាំកម្លាំងដែលនៅក្រៅតំបន់ មកធ្វើការល្បាតបង្កបញ្ហា ដែលប៉ះពាល់​ដល់សុខសន្តិភាពនិងស្ថិរភាពក្នុងតំបន់។ យោធាចិននឹងបន្តរក្សាការប្រុងប្រៀបខ្ពស់ ដើម្បីការពារយ៉ាងមុតមាំនូវអធិបតេយ្យ ក៏ដូចជា​សិទ្ធិនិងប្រយោជន៍ដែនសមុទ្ររបស់ខ្លួន ហើយការពារដាច់ខាតនូវសន្តិភាពនិងស្ថិរភាព នៃសមុទ្រចិនខាងត្បូង»។ កាលពីថ្ងៃពុធ អ្នកនាំពាក្យក្រសួងការបរទេសចិន បានឱ្យដឹងដែរថា ទីក្រុងប៉េកាំងក៏បានព្រមានផងដែរ ទៅកាន់សហរដ្ឋអាមេរិកនិងហ្វីលីពីន ពាក់ព័ន្ធនឹងសកម្មភាព​ល្បាតរួមគ្នារវាងប្រទេសទាំងពីរ។

បើតាមអ្នកនាំពាក្យរូបនោះ ចិនបានគូសបញ្ជាក់យ៉ាងច្បាស់អំពីគោលជំហររបស់ខ្លួន ទៅកាន់ហ្វីលីពីន​និងអាមេរិកថា ប្រតិបត្តិការល្បាតរួមរវាងហ្វីលីពីននិងអាមេរិក ដាច់ខាតមិនត្រូវប៉ះពាល់ចំពោះ​អធិបតេយ្យភាពទឹកដី ព្រមទាំងសិទ្ធិនិងផលប្រយោជន៍ដែនសមុទ្ររបស់ចិនឡើយ។ កាលពីថ្ងៃអង្គារសប្តាហ៍នេះ អាជ្ញាធរហ្វីលីពីន បានប្រកាសថា យោធាខ្លួន​ហើយនិងយោធាអាមេរិក បានចាប់ផ្តើមការល្បាតដែនសមុទ្រនិងអាកាសរួមគ្នា នៅក្បែរដែនកោះចុងភាគខាងជើងបំផុត​នៃប្រទេសហ្វីលីពីន។

គួរបញ្ជាក់ថា ទំនាក់ទំនងទ្វេភាគីបានធ្លាក់ចុះដុនដាបខ្លាំងរវាងចិននិងហ្វីលីពីន ជុំវិញជម្លោះនៅសមុទ្រចិនខាងត្បូង ក្រោមការដឹកនាំរបស់​ប្រធានាធិបតីហ្វីលីពីន លោក Ferdinand Marcos Jr ដ្បិតរូបលោកបានងាកទៅពង្រឹងទំនាក់ទំនងជាមួយអាមេរិក ដែលជួយគាំទ្រ​ប្រទេសអាស៊ានមួយនេះ នៅក្នុងបញ្ហាវិវាទដែនសមុទ្រជាមួយចិន៕

រូបភាពពីកងទ័ពជើងទឹកអាមេរិក