(ប៉េកាំង)៖ កាលពីថ្ងៃពុធសប្តាហ៍នេះ ក្រសួងការបរទេសចិនបានចេញមុខលើកឡើងថា វាគឺជាប្រយោជន៍សម្រាប់ភាគីទាំងអស់ ក្នុងការជួយ​ធានានូវសុខសន្តិភាពក៏ដូចជាស្ថិរភាព នៅតំបន់ឧបទ្វីបកូរ៉េ បន្ទាប់ពីកូរ៉េខាងជើងបានទទួលជោគជ័យ ក្នុងការយកផ្កាយរណបស៉ើបការណ៍​ដំបូងបំផុតរបស់ខ្លួន ទៅដាក់ក្នុងគន្លងទីអវកាស ហើយបានប្តេជ្ញាថា នឹងបាញ់បង្ហោះជាបន្តបន្ទាប់បន្ថែមទៀត នាពេលអនាគត។ នេះបើតាម​ការចេញផ្សាយដោយ ទីភ្នាក់ងារព័ត៌មាន Reuters នៅថ្ងៃព្រហស្បតិ៍ ទី២៣ ខែវិច្ឆិកា ឆ្នាំ២០២៣។

ក្រោយការប៉ុនប៉ងបរាជ័យចំនួន២លើក ការប្រកាសទទួលជោគជ័យ ក្នុងការព្យាយាមជាលើកទី៣របស់កូរ៉េខាងជើង កាលពីថ្ងៃពុធសប្តាហ៍នេះ បានបង្កឱ្យ​ប្រទេសជិតខាង រួមមានកូរ៉េខាងត្បូងនិងជប៉ុន បង្ហាញការមិនពេញចិត្តជាខ្លាំង។ ឆ្លើយតបសំណួររបស់ អ្នកសារព័ត៌មានពាក់ព័ន្ធស្ថានការណ៍នេះ លោកស្រី Mao Ning អ្នកនាំពាក្យក្រសួងការបរទេសចិន បាននិយាយយ៉ាងដូច្នេះថា «ចិនបានកត់សម្គាល់ឃើញ សេចក្តីប្រកាសអំពី​ការបាញ់បង្ហោះផ្កាយរណបដោយជោគជ័យរបស់កូរ៉េខាងជើង ហើយនិងការបញ្ចេញប្រតិកម្មពីសំណាក់ភាគីពាក់ព័ន្ធ។ ការរក្សាសុខសន្តិភាព និងស្ថិរភាពនៅឧបទ្វីបកូរ៉េ ព្រមទាំងការលើកកម្ពស់នីតិវិធីដោះស្រាយតាមផ្នែកនយោបាយ សម្រាប់បញ្ហាឧបទ្វីបកូរ៉េ គឺជាប្រយោជន៍រួម​សម្រាប់​ប្រទេសទាំងអស់ នៅក្នុងតំបន់»។

ជាចុងក្រោយ លោកស្រីអ្នកនាំពាក្យចិន បានលើកឡើងថា បើតាមក្តីសង្ឃឹមរបស់ទីក្រុងប៉េកាំង គឺភាគីទាំងអស់គួរតែរក្សាភាពស្ងប់ស្ងាត់ ព្រមទាំងអនុវត្តការអត់ធ្មត់ ហើយចូលរួមជជែកគ្នាដោយសន្តិវិធីនិងប្រកបដោយអត្ថន័យ ដើម្បីដោះស្រាយក្តីកង្វល់ស្របច្បាប់រៀងៗខ្លួន នៅក្នុងរបៀបមួយ​ដែលមានតុល្យភាព ហើយទន្ទឹមគ្នានោះ ទីក្រុងប៉េកាំងនឹងបន្តដើរតួនាទីស្ថាបនា ក្នុងការលើកស្ទួយដំណោះស្រាយតាមផ្នែកនយោបាយ សម្រាប់បញ្ហាឧបទ្វីបកូរ៉េ៕

រូបភាពពី AFP