(មូស្គូ)៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានប្រាប់ក្រុមប្រទេសសេដ្ឋកិច្ចធំៗដែលហៅកាត់ថា G20 នៅថ្ងៃពុធនេះសប្តាហ៍នេះថា វាចាំបាច់ត្រូវពិចារណាពីវិធីដើម្បីបញ្ឈប់ «សោកនាដកម្ម» នៃសង្រ្គាមនៅអ៊ុយក្រែន ហើយបាននិយាយថា ទីក្រុងម៉ូស្គូមិនដែលបដិសេធមិនចូលរួម ក្នុងកិច្ចចរចាសន្តិភាពជាមួយទីក្រុងកៀវនោះទេ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃទី២២ ខែវិច្ឆិកា​ ឆ្នាំ២០២៣។

ថ្លែងទៅកាន់មេដឹកនាំ G20 ជាលើកដំបូង ចាប់តាំងពីការចាប់ផ្តើមនៃសង្រ្គាម ប្រមុខវិមានក្រឹមឡាំង បានទទួលពីសោកនាដកម្មក្នុងសង្គ្រាមអ៊ុយក្រែន ដោយបាននិយាយយ៉ាងដូច្នេះថា «អ្វីដែលកំពុងកើតឡើងនៅក្នុងប្រទេសអ៊ុយក្រែនគឺជាសោកនាដកម្មមួយ ហើយពួកគេត្រូវតែស្វែងរកមធ្យោបាយដើម្បីបញ្ឈប់វា»។

លោក ពូទីន​ បានសង្កត់ធ្ងន់ថា «មែនហើយ សកម្មភាពយោធាតែងតែជាសោកនាដកម្ម សម្រាប់មនុស្សជាក់លាក់ គ្រួសារជាក់លាក់ និងប្រទេសទាំងមូល។ ហើយ​ជា​ការ​ពិត​ណាស់ យើង​ត្រូវ​តែ​គិត​ពី​របៀប​ដើម្បី​បញ្ឈប់​សោកនាដកម្ម​នេះ»។

ទន្ទឹមនឹងនេះ លោក ពូទីន ថែមទាំងបានចង្អុលមុខអ៊ុយក្រែនថា ជាអ្នកដែលបដិសេធមិនចរចា និងបិទផ្លូវសម្រាប់ការសន្ទនា ចំណែកទីក្រុងម៉ូស្គូតែងតែត្រៀមខ្លួនជាស្រេចដើម្បីចាត់វិធានការបែបនេះ។

ដោយ​លើក​ហេតុផល​ថា ទីក្រុង​ម៉ូស្គូ​កំពុង​ព្យាយាម​សម្រេច​បាន​យុត្តិធម៌​ក្នុង​ប្រទេស​អ៊ុយក្រែន ប្រធានាធិបតីរុស្ស៉ីរូបនេះ​បាន​និយាយ​ថា ​ភាពតានតឹង​ក្នុង​សេដ្ឋកិច្ច​ពិភពលោក​មិនមែន​ដោយសារ​រុស្ស៊ី​ទេ ប៉ុន្តែ​ដោយសារ​សកម្មភាព​របស់​ប្រទេស​ដទៃ។

គួរបញ្ជាក់ថា រុស្ស៊ីនិយាយថា ខ្លួនបានចាប់ផ្តើម «ប្រតិបត្តិការយោធាពិសេស» របស់ខ្លួនក្នុងប្រទេសអ៊ុយក្រែន «ដើម្បីបំផ្លាញ និងរំសាយអាវុធអ៊ុយក្រែន និងការពារប្រជាជនដែលនិយាយភាសារុស្សីរបស់ប្រទេសនេះ»។ ប៉ុន្តែលោកខាងលិចចាត់ទុកយុទ្ធនាការយោធា ដែលបានចាប់ផ្តើមនៅក្នុងខែកុម្ភៈឆ្នាំ ២០២២ នេះ ជាសង្រ្គាមនៃការឈ្លានពាន៕