(ម៉ានីល)៖ ប្រធានាធិបតីហ្វីលីពីន លោក Ferdinand Marcos Jr បានប្រកាសថា កម្មវិធីល្បាតដែនសមុទ្រនិងដែនអាកាសរួមគ្នា នៅឯតំបន់សមុទ្រចិនខាងត្បូង រវាងប្រទេសហ្វីលីពីននិងសហរដ្ឋអាមេរិក គឺត្រូវបានចាប់ផ្តើមហើយនាថ្ងៃអង្គារនេះ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នៅថ្ងៃអង្គារ​ ទី២១ ខែវិច្ឆិកា ឆ្នាំ២០២៣។

សេចក្តីប្រកាសខាងលើរបស់មេដឹកនាំហ្វីលីពីនធ្វើឡើង ចំពេលមួយដែលទំនាក់ទំនង បាននិងកំពុងត្រូវរឹតបន្តឹងជាខ្លាំងនៅក្នុងឆ្នាំនេះ រវាងប្រទេសសម្ព័ន្ធមិត្តទាំងពីរ ដែលរួមមានទាំងការសម្រេចចិត្តបង្កើនជិតទ្វេដង នូវចំនួនមូលដ្ឋានទ័ពហ្វីលីពីន ដែលយោធាអាមេរិកមានសិទ្ធិ​ប្រើប្រាស់ ហើយក្នុងចំណោមនោះ មូលដ្ឋានយោធាខ្លះ ស្ថិតនៅបែរមុខទៅរកកោះតៃវ៉ាន់ ព្រមទាំងសមុទ្រចិនខាងត្បូង។ លោក Marcos បាននិយាយ​ដូច្នេះថា «កិច្ចផ្តួចផ្តើមដ៏សំខាន់មួយនេះ ជាសក្ខីភាពនៃការប្តេជ្ញាចិត្ត ដើម្បីពង្រឹងសមត្ថភាពធ្វើប្រតិបត្តិការរួមគ្នា រវាងកងកម្លាំង​យោធារបស់យើង នៅក្នុងការងារល្បាតតាមដែនសមុទ្រ ក៏ដូចជាតាមដែនអាកាស»។

បើតាមលោកប្រធានាធិបតីហ្វីលីពីន កិច្ចការល្បាតរួមគ្នានោះនឹងប្រព្រឹត្តទៅនៅក្បែរកោះ Mavulis ដែលជាកោះស្ថិតនៅចុងបំផុត នៃភាគខាងជើង​ប្រទេសហ្វីលីពីន ចម្ងាយប្រហែល១០០គីឡូម៉ែត្រពីតៃវ៉ាន់។ លោក Marcos បានធ្វើសេចក្តីប្រកាសបែបនេះ នៅ១ថ្ងៃបន្ទាប់ពីលោកបានប្រាប់វេទិកាមួយ នៅរដ្ឋ Hawaii នៃសហរដ្ឋអាមេរិក ថាស្ថានការណ៍នៅសមុទ្រចិនខាងត្បូង បានឈានដល់​សភាពកាន់តែដុនដាបជាងមុន ក្រោយមានការប្រឈមមុខគ្នាជាបន្តបន្ទាប់ ជាមួយនាវាឆ្មាំសមុទ្រចិន នៅបរិវេណតំបន់មានបញ្ហាវិវាទនៃដែនសមុទ្រនោះ។

គួរបញ្ជាក់ថា កម្មវិធីល្បាតដែនសមុទ្រនិងអាកាសរួមខាងលើ មុខជានឹងធ្វើឱ្យចិនក្តៅស្លឹកត្រចៀកថែមទៀតមិនខានឡើយ ដ្បិតទីក្រុងប៉េកាំងធ្លាប់បាន​ព្រមាន ហ្វីលីពីនម្តងហើយម្តងទៀត ប្រឆាំងនឹងការធ្វើសកម្មភាពទាំងឡាយជាមួយសហរដ្ឋអាមេរិក ដែលខ្លួនអះអាងថា អាចបង្កើនភាពតានតឹង​នៅក្នុងតំបន់។ យោងតាមសេចក្តីថ្លែងការណ៍មួយពីយោធាហ្វីលីពីន គឺខាងហ្វីលីពីននឹងចល័តនាវាយោធាជើងទឹក៣គ្រឿង យន្តហោះចម្បាំងធុនស្រាល FA-50 ២គ្រឿង និងយន្តហោះវាយប្រហារធុនស្រាល A-29B ១គ្រឿង ខណៈខាងសហរដ្ឋអាមេរិកវិញ នឹងចល័តនាវាចម្បាំងធុនស្រាលប្រភេទ LCS ១គ្រឿង រួមជាមួយយន្តហោះល្បាតនិងស៉ើបការណ៍ដែនសមុទ្រ P9-A ១គ្រឿង៕

រូបភាពពី Reuters