(ម៉ានីល)៖ អាជ្ញាធរគ្រោះមហន្តរាយហ្វីលីពីន បានឱ្យដឹងនៅថ្ងៃសៅរ៍នេះថា​ មនុស្សយ៉ាងហោចណាស់ចំនួន៦នាក់ បានបាត់បង់ជីវិត ដោយសារគ្រោះរញ្ជួយដីកម្រិត៦.៧រ៉ិចទ័រ ដែលបានវាយប្រហារភាគខាងត្បូងប្រទេសអាស៊ានមួយនេះ កាលពីថ្ងៃសុក្រ ខណៈ២នាក់ទៀត បានបាត់ខ្លួន។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នៅថ្ងៃសៅរ៍ ទី១៨ ខែវិច្ឆិកា ឆ្នាំ២០២៣។

គ្រោះរញ្ជួយដីខាងលើបានកើតឡើងនៅក្បែរកោះ Mindanao កាលពីល្ងាចថ្ងៃសុក្រសប្តាហ៍នេះ នៅក្រោមផ្ទៃសមុទ្រជម្រៅ៦០គីឡូម៉ែត្រ។ យោងតាមរូបភាពនិងឃ្លីបវីដេអូបង្ហោះលើបណ្តាញទំនាក់ទំនងសង្គម វាបានបង្កឱ្យមានការខូចខាតមួយចំនួន រួមមានទាំងផ្សារទំនើបធំៗ​២កន្លែង ដែលបានបាក់ស្រុតដំបូល។

អាជ្ញាធរគ្រប់គ្រងគ្រោះមហន្តរាយនៃទីក្រុង General Santos ក្នុងខេត្ត South Cotabato បានឱ្យដឹងថា ក្រោយហេតុការណ៍រញ្ជួយដី មនុស្ស៣នាក់ត្រូវបានរាយការណ៍ថាស្លាប់ នៅទីនោះ។ ចំណែកនៅក្រុង Glan នៃខេត្ត Sarangani មានមនុស្សយ៉ាងហោច២នាក់ស្លាប់ ខណៈដែល​ក្រុមសង្រ្គោះកំពុងព្យាយាមស្វែងរក មនុស្ស២នាក់ផ្សេងទៀតដែលបានបាត់ខ្លួន។ រីឯនៅខេត្ត Davao Occidental បុរសវ័យ​៧៨ឆ្នាំម្នាក់ បានបាត់បង់ជីវិត។

គួរបញ្ជាក់ថា ប្រធានាធិបតីហ្វីលីពីន លោក Ferdinand Marcos Jr បានបង្គាប់ឱ្យទីភ្នាក់ងាររដ្ឋាភិបាលដែលពាក់ព័ន្ធ ធានាសុវត្ថិភាពនិងសុខុមាលភាពរបស់ប្រជាជនគ្រប់រូប ដែលបានរងការប៉ះពាល់ពីគ្រោះរញ្ជួយដីនេះ។ ប្រទេសហ្វីលីពីនលាតសន្ធឹងនៅលើតំបន់គេហៅថា ខ្សែក្រវាត់ភ្នំភ្លើងនៃមហាសមុទ្រប៉ាស៉ីហ្វិក ឬ Pacific Ring of Fire ជាទីដែលសកម្មភាពភ្នំភ្លើងនិងរញ្ជួយដី កើតមានឡើងជាញឹកញាប់៕