(បាគូ)៖ កាលពីថ្ងៃព្រហស្បតិ៍សប្តាហ៍នេះ ក្រសួងការបរទេសនៃប្រទេសអាស៊ែបៃហ្សង់ បាននិយាយថា ខ្លួនមិនអាចចូលរួមក្នុងកិច្ចប្រជុំមួយ ​ជាមួយរដ្ឋមន្រ្តីការបរទេសអាមេនី ដែលត្រូវបានគ្រោងធ្វើឡើងនាថ្ងៃទី២០ ខែវិច្ឆិកា នៅឯទីក្រុងវ៉ាស៉ីនតោនឡើយ ដោយសារតែការប្រកាន់់ភាពលម្អៀង​របស់សហរដ្ឋអាមេរិក។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នៅថ្ងៃសុក្រ ទី១៧ ខែវិច្ឆិកា ឆ្នាំ២០២៣។

ក្រសួងការបរទេសអាស៊ែបៃហ្សង់បានបន្តថា ក្រុមមន្រ្តីជាន់ខ្ពស់អាមេរិក ក៏មិនត្រូវបានស្វាគមន៍នៅទីក្រុងបាគូដែរ ដោយសារហេតុផលដូចគ្នា។ ដោយឡែក បើយោងតាមសេចក្តីរាយការណ៍ពីទីភ្នាក់ងារព័ត៌មានរុស្ស៉ី TASS នៅក្នុងថ្ងៃដដែល នាយករដ្ឋមន្រ្តីអាមេនី លោក Nikol Pashinyan បាននិយាយថា រូបលោកមានបំណងបង្កើន កិច្ចប្រឹងប្រែងផ្នែកការទូតនិងនយោបាយថែមទៀត​ ដើម្បីឆ្ពោះទៅរកការចុះសន្ធិសញ្ញាសន្តិភាព​ជាមួយអាស៊ែបៃហ្សង់។

ប្រទេសជិតខាងទាំងពីរនេះ បានស្ថិតក្នុងជម្លោះជាមួយគ្នា អស់រយៈពេលជាច្រើនទសវត្សរ៍មកហើយ ជាចម្បងគឺជុំវិញបញ្ហាតំបន់ Nagorno-Karabakh ដែលជាអន្តរជាតិត្រូវបានទទួលស្គាល់ជាទឹកដីរបស់អាស៊ែបៃហ្សង់ ប៉ុន្តែភាគច្រើនសម្បូរទៅដោយវត្តមាន និងស្ថិតនៅក្រោម​ការគ្រប់គ្រងរបស់ក្រុមជនជាតិអាមេនី ដែលមានការគាំទ្រពីរដ្ឋាភិបាលអាមេនី រហូតទាល់តែអាស៊ែបៃហ្សង់ បានវាយដណ្តើមយកតំបន់នោះ​មកគ្រប់គ្រងវិញ កាលពីខែកញ្ញា ឆ្នាំនេះ។

អាស៊ែបៃហ្សង់បានច្រានចោលជាពិសេស ចំពោះការអត្ថាធិប្បាយបែបកាន់ជើងលម្អៀងទៅតែម្ខាង ធ្វើឡើងដោយឧបការីរដ្ឋមន្រ្តីការបរទេសអាមេរិកលោក James O'Brien ទៅកាន់គណៈកម្មាធិការកិច្ចការបរទេសនៃសភាតំណាងរាស្រ្តអាមេរិក កាលពីថ្ងៃពុធសប្តាហ៍នេះ។ ទីក្រុងបាគូបានអះអាងថា នៅពេលដែលលោក O'Brien និយាយថា ការប្រើប្រាស់កងម្លាំងយោធារបស់អាស៊ែបៃហ្សង់ កាលពីខែកញ្ញា បានបង្ខំឱ្យភាគច្រើននៃជនជាតិភាគតិចអាមេនីប្រមាណ១០០,០០០នាក់ នាំគ្នារត់ភៀសខ្លួននោះ គឺលោកមិនបានលើកឡើងឡើយ នូវការឈរជើងដោយខុសច្បាប់ នៃកងកម្លាំងប្រដាប់អាវុធអាមេនីជាង ១០,០០០នាក់។

ជាចុងក្រោយ អាស៊ែបៃហ្សង់បាននិយាយថា លោក O'Brien ក៏មិនបានលើកឡើងផងដែរថា សម្រាប់រយៈពេលជាង២ខែ អាមេនី​មិនបានឆ្លើយតបចំពោះសំណើសន្តិភាព របស់អាស៊ែបៃហ្សង់ទេ ហើយមួយវិញទៀតនោះ គឺស្របពេលដែលទីក្រុងវ៉ាស៉ីនតោន បន្តផ្តល់ការ​គាំទ្ររបស់ខ្លួនចំពោះអាមេនីក៏ដោយ តាមពិតសហរដ្ឋអាមេរិកគឺជាអ្នកបង្កហេតុ និងជាប្រភពនៃការបង្កអស្ថិរភាព នៅក្នុងតំបន់ទៅវិញទេ៕

រូបភាពពី AFP