(តៃប៉ិ)៖ កាលពីថ្ងៃអង្គារសប្តាហ៍នេះ គណបក្សប្រឆាំងនាំមុខគេទាំងពីរនៅកោះតៃវ៉ាន់ បានប្រកាសថា ពួកគេនឹងចូលរួមកម្លាំងជាមួយគ្នា សម្រាប់ការបោះឆ្នោតជ្រើសរើសមេដឹកនាំអាណត្តិថ្មី ដែលត្រូវប្រព្រឹត្តទៅនាខែមករា ឆ្នាំក្រោយ ប៉ុន្តែពួកគេមិនទាន់សម្រេចថា តើបេក្ខជនរបស់ភាគីខាងណា ដែលនឹងត្រូវឈរឈ្មោះជាបេក្ខជនមេដឹកនាំ ឬបេក្ខជនមេដឹកនាំរង នៅឡើយទេ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃពុធ ទី១៥ ខែវិច្ឆិកា ឆ្នាំ២០២៣។
គណបក្ស Kuomintang (KMT) ដែលជាបក្សប្រឆាំងធំជាងគេរបស់តៃវ៉ាន់ ហើយនិងគណបក្សប្រឆាំងមួយទៀតគឺ Taiwan People's Party (TPP) បានស្ថិតក្នុងកិច្ចពិភាក្សាជាមួយគ្នា អស់រយៈពេលប៉ុន្មានសប្តាហ៍មកហើយ ស្តីពីការចងសម្ព័ន្ធភាព ខណៈបេក្ខជននៃបក្សទាំង២ កំពុងប្រជែងសំឡេងគាំទ្រគ្នា ជុំវិញការជ្រើសរើសថា តើនរណាគួរតែឈរឈ្មោះជាបេក្ខជនមេដឹកនាំ ក្នុងការបោះឆ្នោតថ្ងៃទី១៣ ខែមករា ឆ្នាំ២០២៤។ បើតាមការស្ទង់មតិកន្លងមកនេះ បេក្ខជនរបស់គណបក្ស KMT លោក Hou Yu Ih មានសំឡេងគាំទ្រប្រកៀកប្រកិតគ្នាជាមួយលោក Ko Wen Je ដែលជាបេក្ខជនរបស់គណបក្ស TPP។
អតីតមេដឹកនាំតៃវ៉ាន់ លោក Ma Ying-jeou ដែលជាបុគ្គលដ៏មានឥទ្ធិពលនៅគណបក្ស KMT បានប្រកាសថា KMT និង TPP បានសម្រេចចុះកិច្ចព្រមព្រៀងសហប្រតិបត្តិការជាមួយគ្នា។ គណបក្សទាំង២ បានឯកភាពគ្នាឱ្យមានអ្នកជំនាញ៣រូប វាយតម្លៃទៅលើការស្ទង់មតិមួយចំនួន ដែលប្រព្រឹត្តទៅចាប់ពីថ្ងៃទី៧ ដល់ថ្ងៃទី១៧ ខែវិច្ឆិកា ហើយលទ្ធផលស្តីពីបេក្ខជននាំមុខ នឹងត្រូវប្រកាសនៅថ្ងៃសៅរ៍សប្តាហ៍នេះ។ លោក Ko Wen Je បានសាទរកិច្ចព្រមព្រៀងខាងលើ ស្របពេលលោក Hou Yu Ih បានលើកឡើងថា «ទោះបីជាលទ្ធផលចេញមកបែបណាក្តី ហើយនរណាជាបេក្ខជនមេដឹកនាំ ឬបេក្ខជនមេដឹកនាំរងក៏ដោយ ពួកយើងត្រូវធ្វើការជាមួយគ្នា ដើម្បីធានាសុខសន្តិភាពនិងស្ថិរភាពនៅតៃវ៉ាន់»។
គួរបញ្ជាក់ថា យោងតាមលទ្ធផលស្ទង់មតិ ចេញផ្សាយកាលពីថ្ងៃចន្ទសប្តាហ៍នេះ ដោយប្រព័ន្ធផ្សព្វផ្សាយក្នុងស្រុក United Daily News មេដឹកនាំរងកោះតៃវ៉ាន់ លោក Lai Ching-te (William Lai) ដែលជាបេក្ខជនរបស់បក្សកាន់អំណាច Democratic Progressive Party (DPP) មានការគាំទ្រនាំមុខគេជាមួយសំឡេង២៦ភាគរយ។ រីឯលោក Ko ស្ថិតនៅលេខ២ ជាមួយសំឡេងគាំទ្រ២១ភាគរយ និងលោក Hou ស្ថិតនៅលេង២ ជាមួយសំឡេង១៨ភាគរយ៕
រូបភាពពី AFP