(ហាណូយ)៖ ទីក្រុង Hue ដែលជាទីក្រុងបុរាណរបស់វៀតណាម និងជាទីតាំងសម្បត្តិបេតិកភណ្ឌពិភពលោក ដែលពេញនិយមសម្រាប់ក្រុម​ភ្ញៀវទេសចរ បានស្ថិតក្រោមផ្ទៃទឹក នាថ្ងៃពុធនេះ បន្ទាប់ពីការធ្លាក់ភ្លៀងខ្លាំងនៅភាគកណ្តាលប្រទេសវៀតណាម បានជន់លិចលំនៅដ្ឋាន​រាប់ពាន់ខ្នង និងកាត់ផ្តាច់កំណាត់ផ្លូវហាយវ៉េ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃពុធ ទី១៥ ខែវិច្ឆិកា​ ឆ្នាំ២០២៣។

រូបភាពពីប្រព័ន្ធផ្សព្វផ្សាយក្នុងស្រុកវៀតណាម បានបង្ហាញឱ្យឃើញ ប្រជាជនវៀតណាមនាំគ្នាធ្វើដំណើរដោយជិះទូកលើដងផ្លូវដែលលិចលង់ ខណៈផ្ទះសម្បែងនិងរថយន្ត ត្រូវបានជន់លិច។ អ្នកស្រុកនៅទីក្រុង Hue បានអះអាងថា ទីក្រុងបុរាណនេះ រងការជន់លិចសឹងតែនៅគ្រប់កន្លែង ហើយថាមពលអគ្គិសនី ក៏ត្រូវបានកាត់ផ្តាច់ផងដែរ។ ភ្លៀងបានធ្លាក់ខ្លាំងទៅលើ ខេត្តមួយចំនួននៅភាគកណ្តាលប្រទេសវៀតណាម តាំងតែពី​ថ្ងៃចន្ទសប្តាហ៍នេះ។

អាជ្ញាធរវៀតណាមបានឱ្យដឹងនៅថ្ងៃពុធនេះថា មនុស្សជាង២,០០០នាក់ បានជម្លៀសចេញពីផ្ទះរបស់ពួកគេ នៅឯខេត្ត Quang Tri ជាទី​ដែលមនុស្ស៣នាក់ កំពុងបាត់ខ្លួន។ រីឯផ្នែកមួយចំនួននៃវិថីហាយវ៉េជាតិ ដែលតភ្ជាប់រវាងតំបន់ភាគខាងជើង និងភាគខាងត្បូងវៀតណាម ក៏ត្រូវបានរាំងខ្ទប់ផងដែរ ដោយសារតែគ្រោះបំណាក់ដី បង្កឡើងដោយទឹកជំនន់។

គួរបញ្ជាក់ថា វៀតណាមតែងតែទទួលរងស្ថានភាពអាកាសធាតុអាក្រក់ៗ នៅអំលុងរដូវភ្លៀងចន្លោះខែមិថុនា ដល់ខែវិច្ឆិកា ជារៀងរាល់ឆ្នាំ។ យោងតាមការព្យាករ កម្រិតទឹកភ្លៀងអាចនឹងស្ថិតនៅកម្រិតខ្ពស់ សម្រាប់រយៈពេលប្រហែល២ថ្ងៃទៀត មុនមានភាពប្រសើរឡើង នៅអំលុង​ចុងសប្តាហ៍នេះ។ យោងតាមតួលេខផ្លូវការ គ្រោះធម្មជាតិដែលរួមមានទាំងទឹកជំនន់និងគ្រោះរអិលបាក់ដី បានបង្កឱ្យមនុស្ស១៣៦នាក់ស្លាប់ ឬបាត់ខ្លួន នៅវៀតណាមក្នុងឆ្នាំនេះ៕