(វ៉ាស៊ីនតោន)៖ សហរដ្ឋអាមេរិក និងអង់គ្លេសបានប្រកាសរួមគ្នាកាលពីថ្ងៃអង្គារសប្តាហ៍នេះ អំពីការដាក់ទណ្ឌកម្មជុំទី៣ ប្រឆាំងនឹងក្រុមហាម៉ាស ចាប់តាំងពីការវាយប្រហារកាលពីខែមុនមកលើអ៊ីស្រាអែល ដោយបានកំណត់គោលដៅម្តងទៀតទៅលើក្រុមដែលគាំទ្រដោយអ៊ីរ៉ង់។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃទី១៤ ខែវិច្ឆិកា ឆ្នាំ២០២៣។

សេចក្តីថ្លែងការណ៍របស់ក្រសួងរតនាគារសហរដ្ឋអាមេរិកបាននិយាយថា ការដាក់ទណ្ឌកម្មសំដៅទៅលើ «មន្ត្រីក្រុមហាម៉ាស់សំខាន់ៗ និងយន្តការដែលអ៊ីរ៉ង់ផ្តល់ការគាំទ្រដល់ក្រុមហាម៉ាស់ និងក្រុមជីហាតអ៊ីស្លាមប៉ាឡេស្ទីន»។ ជីហាត​អ៊ីស្លាម​ប៉ាឡេស្ទីន ជា​ក្រុម​សកម្មប្រយុទ្ធ​មួយ​ទៀត​ដែល​កំពុង​ប្រតិបត្តិការ​នៅ​តំបន់​ហ្គាហ្សា។

វិធានការនេះគឺជាការរឹតបន្តឹងមួយទៀត នៃទណ្ឌកម្មរបស់សហរដ្ឋអាមេរិកចាប់តាំងពីការវាយប្រហារកាលពីថ្ងៃទី ៧ ខែតុលា ដែលក្រុមសកម្មប្រយុទ្ធហាម៉ាសបានវាយលុកឆ្លងកាត់ព្រំដែនហ្គាហ្សា ដោយបានសម្លាប់មនុស្ស ១,២០០ នាក់ ដែលភាគច្រើនជាជនស៊ីវិល នេះបើយោងតាមការរាប់របស់អ៊ីស្រាអែល។ ហើយការវាយលុកសងសឹករបស់អ៊ីស្រាអែលចាប់តាំងពីពេលនោះមក បានសម្លាប់មនុស្សប្រហែល ១១,២០០ នាក់ ដែលភាគច្រើនជាជនស៊ីវិលផងដែរ។

រដ្ឋមន្ត្រីការបរទេសអាមេរិក លោក Antony Blinken បាននិយាយនៅក្នុងសេចក្តីថ្លែងការណ៍មួយថា «អ៊ីរ៉ង់អនុញ្ញាតឱ្យក្រុមហាម៉ាស់​ និងកងកម្លាំងឆ្មាំបដិវត្តន៍អ៊ីស្លាម ធ្វើសកម្មភាពភេរវកម្មជាចម្បង តាមរយៈការគាំទ្រដែលផ្តល់ដោយកងឆ្មាំបដិវត្តន៍អ៊ីស្លាម រួមទាំងតាមរយៈការផ្ទេរមូលនិធិ ការផ្តល់អាវុធ និងការហ្វឹកហ្វឺនប្រយុទ្ធជាដើម»។

ទណ្ឌកម្មនេះមានគោលដៅទៅលើ លោក Nasser Abu Sharif តំណាងក្រុមជីហាតអ៊ីស្លាមប៉ាឡេស្ទីននៅអ៊ីរ៉ង់ ក៏ដូចជាក្រុមហ៊ុនប្តូរប្រាក់ Nabil Chouman & Co
នៅក្នុងប្រទេសលីបង់ ដែលបានចោទប្រកាន់ថាគ្រប់គ្រងការផ្ទេរប្រាក់រវាងក្រុមហាម៉ាស និងទីក្រុងតេអេរ៉ង់។

យោងតាមនាយកដ្ឋានរតនាគារបានឱ្យដឹងថា ក្រុមហាម៉ាសកាន់កាប់ទ្រព្យសម្បត្តិសកលដែលប៉ាន់ស្មានថា មានតម្លៃរាប់រយលានដុល្លារ។

រដ្ឋមន្ត្រីក្រសួងរតនាគារអាមេរិក លោកស្រី Janet Yellen បាននិយាយនៅក្នុងសេចក្តីថ្លែងការណ៍មួយថា «សហរដ្ឋអាមេរិកនឹងបន្តធ្វើការជាមួយដៃគូរបស់យើង រួមទាំងចក្រភពអង់គ្លេសផងដែរ ដើម្បីរារាំងសមត្ថភាពរបស់ក្រុមហាម៉ាសក្នុងការប្រមូល និងប្រើប្រាស់មូលនិធិដើម្បីប្រព្រឹត្តអំពើឃោរឃៅ»៕

រូបភាពពី Reuters