(ណៃពិដោ)៖ ក្រុមអ្នកប្រយុទ្ធនៃចលនាតស៊ូប្រដាប់អាវុធជនជាតិភាគតិចមួយ បានបន្តបង្កើនការវាយលុករបស់ពួកគេ លើកងកម្លាំងសន្តិសុខ​នៃរបបសឹកមីយ៉ាន់ម៉ា នៅរដ្ឋ Rakhine ភាគខាងលិចប្រទេស នាថ្ងៃអង្គារនេះ ពោលគឺ២ថ្ងៃជាប់គ្នា។ នេះបើតាមការចេញផ្សាយដោយ ទីភ្នាក់ងារព័ត៌មាន​ AFP នៅថ្ងៃអង្គារ ទី១៤ ខែវិច្ឆិកា ឆ្នាំ២០២៣។

អ្នកនាំពាក្យរបស់ចលនាប្រដាប់អាវុធ Arakan Army (AA) បានអះអាងថា កាលពីព្រឹកថ្ងៃអង្គារនេះ ក្រុមអ្នកប្រយុទ្ធពួកគេដណ្តើមបាន ​ប៉ុស្តិ៍ឈរជើងមួយកន្លែង របស់កងកម្លាំងប៉ូលិសព្រំដែន នៅភូមិ Chinkhali នៃរដ្ឋ Rakhine ហើយចលនា AA បានវាយប្រហារលើ​ប៉ុស្តិ៍យោធាមួយចំនួន នៅលើជម្រាលភ្នំ២កន្លែង ក្នុងតំបន់ Paletwa នៅរដ្ឋក្បែរខាងគ្នាគឺរដ្ឋ Chin​ ថែមទៀត។

កាលពីថ្ងៃចន្ទសប្តាហ៍នេះ ចលនា AA បានប៉ះទង្គិចគ្នាជាមួយកងកម្លាំងសន្តិសុខ នៅឯតំបន់ Rathedaung, Maungdaw, និង Minbya នៃរដ្ឋ Rakhine ដោយអ្នកប្រយុទ្ធរបស់ខ្លួន៦នាក់ និងកងកម្លាំងសន្តិសុខ១០នាក់ បានបាត់បង់ជីវិត។ ចលនាប្រដាប់អាវុធ​មួយនេះ បានចំណាយពេលរាប់ឆ្នាំមកហើយ ក្នុងការប្រយុទ្ធតស៊ូដើម្បីព្យាយាមទាមទារស្វ័យភាព សម្រាប់ជនជាតិភាគតិចនៃរដ្ឋ Rakhine ហើយ​ក៏មានវត្តមាននៅរដ្ឋ Chin ផងដែរ។

កាលពីខែតុលាកន្លងទៅ ចលនា Arakan Army បានបើកប្រតិបត្តិការវាយលុករួមគ្នា ជាមួយចលនាប្រដាប់អាវុធ​ជនជាតិភាគតិច២ផ្សេងទៀត ប្រឆាំងនឹងកងកម្លាំងរដ្ឋាភិបាលយោធាមីយ៉ាន់ម៉ា នៅពាសពេញមួយផ្នែកធំនៃរដ្ឋ Shan ភាគខាងជើងប្រទេស ក្បែរព្រំប្រទល់ចិន។ ចលនា AA, Myanmar National Democratic Alliance Army (MNDAA), និង Ta'ang National Liberation Army (TNLA) ដណ្តើមបានក្រុងយុទ្ធសាស្រ្តមួយចំនួន ហើយបានបិទខ្ទប់ច្រកពាណិជ្ជកម្ម​សំខាន់ចំនួន២ ជាមួយប្រទេសចិន ព្រមទាំងគ្រប់គ្រងបានច្រកព្រំដែនសំខាន់មួយ។

គួរបញ្ជាក់ថា ការប្រយុទ្ធគ្នានៅភាគខាងជើង ដែលអង្គការសហប្រជាជាតិអះអាងថា បានធ្វើឱ្យប្រជាជនស៉ីវិលយ៉ាងហោចជាង៥០,០០០នាក់ រត់ភៀសខ្លួនពីផ្ទះសម្បែង គឺត្រូវបានក្រុមអ្នកវិភាគមើលឃើញថា ជាបញ្ហាប្រឈមផ្នែកយោធាដ៏ធំមួយ សម្រាប់របបសឹកមីយ៉ាន់ម៉ា គិតចាប់តាំងពីការធ្វើរដ្ឋប្រហារដណ្តើមអំណាច កាលពីខែកុម្ភៈ ឆ្នាំ២០២១ មកទល់នឹងពេលនេះ៕

រូបភាពពី Reuters