(បែរឡាំង)៖ នៅថ្ងៃអង្គារនេះ ប្រមុខការពារជាតិអាល្លឺម៉ង់ បាននិយាយថា សហភាពអឺរ៉ុប (EU) នឹងមិនអាចសម្រេចតាមគោលដៅរបស់ខ្លួន នៃការបញ្ជូនគ្រាប់កាំភ្លើងធំចំនួន ១លានគ្រាប់ ឱ្យទៅអ៊ុយក្រែនបាននោះឡើយ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃអង្គារ ទី១៤ ខែវិច្ឆិកា ឆ្នាំ២០២៣។

កាលពីឆ្នាំ២០២២ សហភាពអឺរ៉ុបបានសន្យាផ្តល់ គ្រាប់កាំភ្លើងធំដ៏ចាំបាច់ទាំងនោះ ឱ្យទៅដល់ដៃអ៊ុយក្រែន នៅត្រឹមខែមីនា ឆ្នាំ២០២៤ ដើម្បីជួយទីក្រុងកៀវ នៅក្នុងសង្រ្គាមប្រយុទ្ធប្រឆាំងកងកម្លាំងឈ្លានពានរបស់រុស្ស៉ី ប៉ុន្តែមកទល់ពេលនេះ ក្រុមប្រទេសជាសមាជិក EU បានផ្តល់ឱ្យអ៊ុយក្រែនត្រឹមតែ៣០០,០០០គ្រាប់ប៉ុណ្ណោះ ចេញពីឃ្លាំងមានស្រាប់របស់ពួកគេ។ ក្រុមប្រទេសអឺរ៉ុបកំពុងដាក់ការបញ្ជាទិញរួមគ្នា សម្រាប់គ្រាប់កាំភ្លើងធំប្រភេទ១៥៥មីលីម៉ែត្រ ប៉ុន្តែទន្ទឹមគ្នាក៏មានមន្ទិលសង្ស័យផងដែរ ជុំវិញសមត្ថភាពនិងល្បឿននៃការផលិតរបស់​ក្រុមហ៊ុនការពារជាតិអឺរ៉ុប។

ថ្លែងក្នុងកិច្ចប្រជុំមួយជាមួយបណ្តាសមភាគី EU របស់លោក នៅទីក្រុងព្រុចសែលនៃប្រទេសបែលហ្ស៉ិក រដ្ឋមន្រ្តីការពារជាតិអាល្លឺម៉ង់ លោក Boris Pistorius បាននិយាយយ៉ាងដូច្នេះថា «គួរឱ្យសោកស្តាយ សំឡេងដែលបានបង្ហាញក្តីបារម្ភ គឺត្រឹមត្រូវនាពេលនេះ។ គោលដៅ​នៃការបញ្ជូនកាំភ្លើងធំឱ្យបាន១លានគ្រាប់ តាមពេលកំណត់ នឹងមិនអាចទៅរួចឡើយ។ ពួកយើងត្រូវតែនាំគ្នាសន្មត់បែបនោះទុកឱ្យហើយ»។

គួរបញ្ជាក់ថា យ៉ាងណាមិញ ក្រុមមន្រ្តី EU បានទទូចថា វាហាក់ដូចជាឆាប់ពេកនៅឡើយ ក្នុងការអះអាងថា គោលដៅនឹងពុំអាចសម្រេច​ទៅបាន ទោះបីជាមន្ទិលសង្ស័យកាន់តែកើនឡើងក៏ដោយ។ ប្រមុខគោលនយោបាយការបរទេសរបស់ EU លោក Josep Borrel បានលើកឡើងថា បញ្ហាចម្បងមួយគឺត្រង់ថា ក្រុមហ៊ុនការពារជាតិអឺរ៉ុប ត្រូវនាំចេញប្រមាណជា៤០ភាគរយ នៃផលិតផលរបស់ពួកគេ ទៅកាន់ប្រទេសដទៃ៕

រូបភាពពី AFP