(ហ៊្សេរុយសាឡិម)៖ យោធាអ៉ីស្រាអែលបាននិយាយថា ក្រុមមួយនៅក្នុងប្រទេសស៉ីរី បានបាញ់យន្តហោះដ្រូនដែលបានវាយប្រហារចំលើ​សាលារៀនមួយកន្លែង ស្ថិតក្នុងទីក្រុង Eilat ភាគខាងត្បូងប្រទេសអ៉ីស្រាអែល កាលពីថ្ងៃព្រហស្បតិ៍សប្តាហ៍នេះ ហើយខ្លួនបានវាយប្រហារតបតវិញ ​ទៅលើក្រុមមួយនោះ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នៅថ្ងៃសុក្រ ទី១០ ខែវិច្ឆិកា ឆ្នាំ២០២៣។

យោធាអ៉ីស្រាអែលមិនបានបញ្ជាក់ថា ក្រុមមួយណាឱ្យប្រាកដឡើយនៅស៉ីរី ដែលបានបាញ់យន្តហោះដ្រូនឆ្ពោះមកកាន់ទីក្រុង Eilat ​ស្ថិតនៅជាប់សមុទ្រក្រហម ប៉ុន្តែបានលើកឡើងថា រដ្ឋាភិបាលស៉ីរីគឺជាអ្នកទទួលខុសត្រូវទាំងស្រុង សម្រាប់សកម្មភាពភេរវកម្ម​ដែលទាំងឡាយណា ដែលកើតចេញមកពីទឹកដីរបស់ប្រទេសស៉ីរី។ យ៉ាងណាមិញ មិនមានសេចក្តីរាយការណ៍ ពីមនុស្សរងគ្រោះថ្នាក់ស្លាប់​ឬរបួស ដោយសារការវាយប្រហារយន្តហោះដ្រូននោះទេ ដ្បិតវាបានបង្កការខូចខាតតិចតួចប៉ុណ្ណោះ។

គួរបញ្ជាក់ថា ចំពោះមុខការធ្វើសង្រ្គាម ប្រឆាំងក្រុមសកម្មប្រយុទ្ធហាម៉ាសប៉ាឡេស្ទីន នៅតំបន់ Gaza Strip អ៉ីស្រាអែល ក៏បានទទួលរង​ការវាយប្រហារ និងបានបាញ់ផ្លោងតបតវិញ ជាមួយក្រុមផ្សេងទៀតផងដែរនៅក្នុងតំបន់ រួមមានដូចជាក្រុម Hezbollah នៃប្រទេសលីបង់ និងក្រុម Houthis នៃប្រទេសយេម៉ែន ជាដើម៕

រូបភាពពី AFP