(ហ្សាការតា)៖ ប្រធានាធិបតីឥណ្ឌូណេស៉ី លោក Joko Widodo បានឱ្យដឹងនៅថ្ងៃព្រហស្បតិ៍នេះថា រូបលោកនឹងនិយាយប្រាប់​ប្រធានាធិបតីអាមេរិក លោក ចូ បៃដិន ក្នុងជំនួបពិភាក្សារវាងមេដឹកនាំទាំងពីរ នៅថ្ងៃចន្ទសប្តាហ៍ក្រោយថា សង្រ្គាមបង្ហូរឈាមដែលកំពុងតែ​បន្តប្រព្រឹត្តទៅរវាងអ៉ីស្រាអែល និងក្រុមហាម៉ាសប៉ាឡេស្ទីន គឺចាំបាច់គួរតែបញ្ឈប់។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃព្រហស្បតិ៍ ទី៩ ខែវិច្ឆិកា ឆ្នាំ២០២៣។

លោក Jokowi បានលើកឡើងដូច្នេះថា «ខ្ញុំនឹងមានកាតព្វកិច្ចត្រូវប្រាប់លោកប្រធានាធិបតី ចូ បៃដិន ថា សង្រ្គាមហាម៉ាស-អ៉ីស្រាអែល គួរតែត្រូវបញ្ឈប់ជាបន្ទាន់» ខណៈលោកមិនបានបញ្ជាក់លម្អិតអ្វីបន្ថែមទៀតឡើយ។ មេដឹកនាំប្រទេសដែលមានប្រជាជនមូស្លីមច្រើនបំផុត​លើពិភពលោកមួយនេះ នឹងត្រូវធ្វើដំណើរទៅកាន់ទីក្រុងរីយ៉ាដ នៃប្រទេសអារ៉ាប៊ីសាអូឌីត ដើម្បីចូលរួមកិច្ចប្រជុំអន្តរជាតិមួយ ស្តីពីសង្រ្គាម​រវាងអ៉ីស្រាអែលនិងក្រុមហាម៉ាស នៅថ្ងៃសុក្រសប្តាហ៍នេះ។ បើតាមលោក Jokowi រូបលោកក៏នឹងពាំនាំលទ្ធផលនៃកិច្ចប្រជុំនោះ ប្រាប់​ទៅកាន់លោកប្រធានាធិបតីអាមេរិក ផងដែរ។

គួរបញ្ជាក់ថា សង្រ្គាមខាងលើបានផ្ទុះឡើង នៅពេលក្រុមខ្មាន់កាំភ្លើងរាប់រយនាក់របស់ហាម៉ាស បានសម្រុកពីតំបន់ Gaza Strip ចូលទៅកាន់អ៉ីស្រាអែល កាលពីថ្ងៃទី៧ ខែតុលា ហើយបានសម្លាប់មនុស្សជាង១,៤០០នាក់ ជាហេតុនាំឱ្យយោធាអ៉ីស្រាអែល បានបើកការវាយប្រហារសងសឹកយ៉ាងខ្លាំងក្លាឥតឈប់ឈរវិញ ទៅលើតំបន់ Gaza ខណៈអាជ្ញាធរនៅទីនោះ បានអះអាងថា គិតមកទល់ពេលនេះ មនុស្សជាង១០,៥០០នាក់ហើយ ត្រូវបានសម្លាប់។ ឥណ្ឌូណេស៉ីបានចូលរួមជាមួយប្រទេសជាច្រើនផ្សេងទៀត ក្នុងការអំពាវនាវឱ្យមានបទឈប់បាញ់ជាបន្ទាន់ ហើយក៏បានបញ្ជូនជំនួយមនុស្សធម៌ទៅកាន់ Gaza ថែមទៀតផង៕

រូបភាពពី AFP