(គូឡាឡាំពួ)៖ សមាជិកសភាមួយរូបនៃប្រទេសម៉ាឡេស៉ី មកពីគណបក្សមួយដែលបានដកខ្លួនចេញពី រដ្ឋាភិបាលចម្រុះកំពុងកាន់អំណាច ជុំវិញក្តីកង្វល់អំពីបញ្ហាអំពើពុករលួយ ត្រូវបានតុលាការជាន់ខ្ពស់នៃទីក្រុងគូឡាឡាំពួរកឃើញថា មានទោសពីបទប្រព្រឹត្តអំពើពុករលួយ។ នេះបើតាមសេចក្តីរាយការណ៍ ពីទីភ្នាក់ងារព័ត៌មានរដ្ឋម៉ាឡេស៉ី Bernama ចេញផ្សាយដោយទីភ្នាក់ងារព័ត៌មាន Reuters នាថ្ងៃព្រហស្បតិ៍ ទី៩ ខែវិច្ឆិកា ឆ្នាំ២០២៣។

លោក Syed Saddiq Syed Abdul Rahman ដែលជាសមាជិកសភាខាងលើ មកពីគណបក្ស MUDA ត្រូវបានតុលាការរកឃើញ​ថាពិតជាទោសពី បទចោទប្រកាន់សរុបចំនួន៤ ពាក់ព័ន្ធការរំលោភទំនុកចិត្ត ការគៃបន្លំទ្រព្យសម្បត្តិ និងការលាងលុយកខ្វក់ ហើយត្រូវបាន​ផ្តន្ទាទោសដាក់ពន្ធនាគាររយៈពេល៧ឆ្នាំ រួមជាមួយការពិន័យជាប្រាក់១០លានរីងហ្គីត ឬស្មើនឹង២.១លានដុល្លារអាមេរិក។ គណបក្ស MUDA បានដកការគាំទ្ររបស់ខ្លួនកាលពីខែកញ្ញា សម្រាប់ក្រុមចម្រុះរបស់ នាយករដ្ឋមន្រ្តីលោក Anwar Ibrahim ដោយសារតែក្តីកង្វល់ជុំវិញ​​អំពើពុករលួយ បន្ទាប់ពីបទចោទប្រកាន់ពាក់ព័ន្ធអំពើពុករលួយ ប្រឆាំងឧបនាយករដ្ឋមន្រ្តីម៉ាឡេស៉ី ត្រូវបានទម្លាក់ចោលវិញ។

លោក Syed Saddiq រងការចោទប្រកាន់ថា បានជួយអតីតមន្រ្តីម្នាក់នៃគណបក្ស Bersatu ក្នុងការកេងប្រវ័ញ្ចប្រាក់ចំនួន ១លានរីងហ្គីត (ជាង២១ម៉ឺនដុល្លារ) ក្នុងមូលនិធិសម្រាប់ក្រុមយុវជនរបស់បក្ស។ បើតាមការចោទប្រកាន់ បទល្មើសនោះត្រូវបានប្រព្រឹត្តទៅកាលពីខែ​មីនា ឆ្នាំ២០២០ នៅពេលគណបក្ស Bersatu កំពុងកាន់អំណាច។ លោក Syed Saddiq ដែលបច្ចុប្បន្នមានអាយុ៣០ឆ្នាំ គឺជាអតីត​ប្រធានក្រុមយុវជនរបស់បក្ស Bersatu ប៉ុន្តែបានចាកចេញដើម្បីទៅបង្កើត គណបក្សនយោបាយផ្ទាល់ខ្លួន គឺ MUDA កាលពីឆ្នាំ២០២០។ លោកធ្លាប់បានឡើងកាន់តួនាទីជា រដ្ឋមន្រ្តីយុវជននិងកីឡារបស់ម៉ាឡេស៉ី កាលពីឆ្នាំ២០១៨ ក្នុងវ័យត្រឹម២៥ឆ្នាំ រហូតដល់ឆ្នាំ២០២០។

គួរបញ្ជាក់ថា យោងតាមប្រព័ន្ធផ្សព្វផ្សាយក្នុងស្រុកម៉ាឡេស៉ី តុលាការជាន់ខ្ពស់ទីក្រុងគូឡាឡាំពួ បានសម្រេចអនុញ្ញាតឱ្យលោក Syed Saddiq អាចពន្យារពេលអនុវត្តទោសជាបណ្តោះអាសន្ន ដើម្បីរង់ចាំការប្តឹងឧទ្ធរណ៍៕

រូបភាពពី Reuters