(ព្យុងយ៉ាង)៖ នៅថ្ងៃពុធនេះ ប្រព័ន្ធផ្សព្វផ្សាយរដ្ឋកូរ៉េខាងជើង បានចេញមុខរិះគន់ដំណើរទស្សនកិច្ចមកកាន់ទីក្រុងសេអ៊ូលនៃប្រទេសកូរ៉េខាងត្បូង ដោយប្រមុខការទូត និងប្រមុខការពារជាតិរបស់សហរដ្ឋអាមេរិក ថាជាទង្វើបង្កហេតុមួយ ដែលនឹងបង្កើន​ភាពតានតឹងថែមទៀតក្នុងតំបន់។ នេះបើតាមការចេញផ្សាយដោយ​ ទីភ្នាក់ងារព័ត៌មាន AFP នៅថ្ងៃពុធ ទី៨ ខែវិច្ឆិកា ឆ្នាំ២០២៣។

ក្រសួងការបរទេសកូរ៉េខាងត្បូង បានឱ្យដឹងថា រដ្ឋមន្រ្តីការបរទេសអាមេរិក លោក Antony Blinken នឹងធ្វើដំណើរមកទីក្រុងសេអ៊ូល នៅយប់ថ្ងៃពុធនេះ ហើយលោកនឹងជួបជាមួយរដ្ឋមន្រ្តីការបរទេសកូរ៉េខាងត្បូង លោក Park Jin នៅថ្ងៃព្រហស្បតិ៍ ដើម្បីពិភាក្សាគ្នាអំពី​បញ្ហាផ្សេងៗ រួមមានទាំងកូរ៉េខាងជើង។ បន្ទាប់ពី ដំណើរទស្សនកិច្ចរយៈពេល២ថ្ងៃរបស់លោក Blinken បញ្ចប់ទៅ រដ្ឋមន្រ្តីការពារជាតិអាមេរិក លោក Lloyd Austin នឹងបំពេញទស្សនកិច្ចមកកាន់ទីក្រុងសេអ៊ូលវិញម្តង ដើម្បីបើកកិច្ចប្រជុំថ្នាក់រដ្ឋមន្រ្តី។

ទីភ្នាក់ងារព័ត៌មានរដ្ឋកូរ៉េខាងជើង KCNA បានលើកឡើងក្នុងបទអត្ថាធិប្បាយមួយយ៉ាងដូច្នេះថា «ពួកភ្ញៀវដែលគ្មានការអញ្ជើញមកពី​ចំហៀងម្ខាងទៀតនៃមហាសមុទ្រ នឹងព្យាយាមស្វែងរកការប្រឈមមុខដាក់គ្នាខ្លាំងៗនៅឧបទ្វីបកូរ៉េ ដែលជាកន្លែងរសើបបំផុតមួយនៅលើ​ពិភពលោក។ សកម្មភាពបង្កហេតុនេះ គឺប្រៀបដូចជាទស្សនកិច្ចមួយ របស់ពួកសង្រ្គាមនិយម ដើម្បីមកចុះធ្វើអធិការកិច្ចផ្ទាល់ក្រោមបំណង ដុតបញ្ឆេះសង្រ្គាមកូរ៉េលើកទី២ យ៉ាងដូច្នោះ។ KCNA បានបន្ថែមថា ដំណើរទស្សនកិច្ចរបស់លោក Blinken និងលោក Austin នឹង​បង្កើត «ដុំពពកសង្រ្គាមថ្មីទៀត» នៅក្នុងតំបន់។

គួរបញ្ជាក់ថា ដំណើរទស្សនកិច្ចរបស់មន្រ្តីជាន់ខ្ពស់អាមេរិកទាំងពីរ កើតមានឡើងស្របពេលដែលទីក្រុងសេអ៊ូល និងទីក្រុងវ៉ាស៉ីនតោនបាន​និងកំពុងបង្កើនកិច្ចសហប្រតិបត្តិការការពារជាតិ ចំពោះមុខការធ្វើតេស្តមីស៉ីលជាបន្តបន្ទាប់របស់ទីក្រុងព្យុងយ៉ាង នៅក្នុងឆ្នាំនេះ និងចំពោះមុខ​ការកើនឡើងភាពស្អិតល្មួតនៃទំនាក់ទំនងរបស់កូរ៉េខាងជើង ជាមួយនឹងប្រទេសរុស្ស៉ី៕

រូបភាពពី AFP