(ឡុងដ៍)៖ រដ្ឋាភិបាលអង់គ្លេស នឹងបើកកិច្ចប្រជុំបន្ទាន់មួយ ដើម្បីឆ្លើយតបទៅនឹងផលប៉ះពាល់ នៃសង្រ្គាមរវាងអ៊ីស្រាអែល និងក្រុមហាម៉ាស លើការរួបរួមសង្គមក្នុងប្រទេសអង់គ្លេសនៅថ្ងៃអង្គារសប្តាហ៍នេះ ចំពេលមានការព្រួយបារម្ភក្នុងចំណោមរដ្ឋមន្ត្រី អំពីការតវ៉ាគាំទ្រប៉ាឡេស្ទីន ដែលគ្រោងនឹងធ្វើឡើងដើម្បីទាមទារបទឈប់បាញ់ នាថ្ងៃឈប់សម្រាកនៅចុងសប្តាហ៍នេះ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃទី០៧ ខែវិច្ឆិកា ឆ្នាំ២០២៣។

អ្នកនាំពាក្យរបស់នាយករដ្ឋមន្ត្រី Rishi Sunak បាននិយាយយ៉ាងដូច្នេះថា «ឧបនាយករដ្ឋមន្ត្រី នឹងធ្វើជាប្រធានកិច្ចប្រជុំឆ្លើយតបបន្ទាន់មួយ ដើម្បីសម្របសម្រួលការឆ្លើយតបរបស់រដ្ឋាភិបាល ចំពោះស្ថានភាពនៅអ៊ីស្រាអែល និងហ្គាហ្សា»។

សេចក្តីថ្លែងការណ៍បានបន្តថា «វានឹងមើលទៅលើផ្នែកដ៏ធំទូលាយ ប៉ុន្តែជាក់ស្តែងជាមួយនឹងការផ្តោត ជាពិសេសលើផលប៉ះពាល់ នៃការវាយប្រហារភេរវកម្ម មកលើចក្រភពអង់គ្លេស និងរបៀបដែល អាចដោះស្រាយបញ្ហាសំខាន់ៗមួយចំនួន ជុំវិញការរួបរួមសហគមន៍»៕

រូបភាពពី AFP