(សេអ៊ូល)៖ ប្រព័ន្ធផ្សព្វផ្សាយ Yonhap ដោយផ្អែកលើប្រភពពីបណ្តាញស៉ើបការណ៍សម្ងាត់កូរ៉េខាងត្បូង បានរាយការណ៍កាលពីថ្ងៃពុធ​សប្តាហ៍នេះថា កូរ៉េខាងជើងកំពុងស្ថិតនៅដំណាក់កាលចុងក្រោយ នៃការត្រៀមលក្ខណៈបាញ់បង្ហោះផ្កាយរណបចារកម្មយោធាសាជាថ្មី ហើយមានឱកាសទទួលជោគជ័យខ្ពស់ នៅក្នុងការប៉ុនប៉ងលើកទី៣នេះ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នៅថ្ងៃព្រហស្បតិ៍ ទី២ ខែវិច្ឆិកា ឆ្នាំ២០២៣។

ក្នុងឆ្នាំ២០២៣នេះ កូរ៉េខាងជើងបានព្យាយាមដល់ទី២លើករួចមកហើយ ដើម្បីនាំយកផ្កាយរណបយោធាចារកម្មដំបូងបំផុតរបស់ខ្លួន ទៅដាក់នៅ​គន្លងអវកាស ប៉ុន្តែបានទទួលបរាជ័យទាំង២លើក។ វាគឺជាផ្នែកនៃកិច្ចប្រឹងប្រែងរបស់មេដឹកនាំកូរ៉េខាងជើង លោក គីម ជុងអ៊ុន ក្នុងការពង្រឹងសមត្ថភាពយោធារបស់ទីក្រុងព្យុងយ៉ាង ដែលរួមមានទាំងមីស៉ីលបាលិស្ទីគរយៈចម្ងាយឆ្ងាយ មីស៉ីលបាលិស្ទីគបាញ់ចេញពី​នាវាមុជទឹក ហើយនិងមីស៉ីលល្បឿនលឿនជាងសំឡេង។

គួរបញ្ជាក់ថា កន្លងមក កូរ៉េខាងជើងធ្លាប់បានប្តេជ្ញា ធ្វើការព្យាយាមបាញ់បង្ហោះផ្កាយរណបចារកម្មជាលើកទី៣ កាលពីខែតុលា ប៉ុន្តែមកទល់​នឹងពេលនេះ មិនទាន់បានបង្ហាញតំរុយណាមួយ ថាវានឹងប្រព្រឹត្តទៅក្នុងពេលឆាប់ៗនៅឡើយទេ។ កាលពីខែកញ្ញា លោក គីម ជុងអ៊ុន បានទៅជួបប្រធានាធិបតីរុស្ស៉ី លោក វ៉្លាឌីមៀ ពូទីន នៅឯតំបន់ចុងបូព៌ានៃប្រទេសរុស្ស៉ី ជាទីដែលរូបលោកបានដើរទស្សនា ​មូលដ្ឋានបាញ់បង្ហោះយានអវកាសទំនើបបំផុតរបស់រុស្ស៉ី ជាហេតុនាំឱ្យមានការសង្ស័យថា ទីក្រុងមូស្គូអាចនឹងជួយកម្មវិធីវិស័យអវកាស របស់លោក គីម ជាថ្នូរនឹងការផ្គត់ផ្គង់អាវុធពីកូរ៉េខាងជើង ឱ្យទីក្រុងមូស្គូ៕

រូបភាពពី Reuters