(តូក្យូ)៖ បាតុករប្រមាណ ១,០០០នាក់ មកពីសហគមន៍អ៊ីស្លាមរបស់ប្រទេសជប៉ុន បានប្រមូលផ្តុំគ្នានៅក្នុងសង្កាត់ Ichigaya នៃទីក្រុងតូក្យូក្បែរស្ថានទូតអ៊ីស្រាអែល កាលពីថ្ងៃអាទិត្យ ដើម្បីតវ៉ាចំពោះការទម្លាក់គ្រាប់បែកនៅតំបន់ហ្គាហ្សា។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃទី៣០ ខែតុលា ឆ្នាំ២០២៣។
ក្រុមបាតុករបានសម្តែងការខឹងសម្បារ ចំពោះការទម្លាក់គ្រាប់បែករបស់កងទ័ពអ៊ីស្រាអែលលើជនស៊ីវិលនៅតំបន់ហ្គាហ្សា។ ស្ត្រីប៉ាឡេស្ទីនម្នាក់ដែលមានគ្រួសារនៅហ្គាហ្សាបានប្រាប់អ្នកសារព័ត៌មានថា សមាជិកនៃគ្រួសាររបស់នាង ត្រូវបានសម្លាប់ដោយការទម្លាក់គ្រាប់បែករបស់អ៊ីស្រាអែល ហើយថានាងចង់ឃើញបទឈប់បាញ់មួយ។
សហគមន៍នៃជាតិសាសន៍ផ្សេងៗគ្នាដូចជា ឥណ្ឌូនេស៊ី បង់ក្លាដែស ប៉ាគីស្ថាន ម៉ារ៉ុក តួក និងអ៊ូសបេក បានស្រែកពាក្យស្លោកដូចជា «អ៊ីស្រាអែលជាភេរវករ»។
តាមសេចក្តីរាយការណ៍បានឱ្យដឹងថា ការទម្លាក់គ្រាប់បែករបស់អ៊ីស្រាអែលល បានសម្លាប់មនុស្សជាង ៨,០០០នាក់នៅខាងប៉ាឡេស្ទីន ហើយរដ្ឋាភិបាលអ៊ីស្រាអែល បដិសេធមិនប្រកាសបទឈប់បាញ់ ដោយសារហេតុផលមនុស្សធម៌ បើទោះបីជាមានដំណោះស្រាយរបស់អង្គការសហប្រជាជាតិក៏ដោយ។
បាតុករបានប្រមូលផ្តុំគ្នានៅជិតស្ថានទូតអ៊ីស្រាអែលក្នុងទីក្រុងតូក្យូ ហើយបានលើកពាក្យស្លោកថា «រំដោះប៉ាឡេស្ទីន» «អ៊ីស្រាអែលជាភេរវករ» និង «ពីទន្លេដល់សមុទ្រ ប៉ាឡេស្ទីននឹងត្រូវបានរំដោះ»។ ពួកគេក៏បានថ្កោលទោស «អំពើប្រល័យពូជសាសន៍ដែលបានប្រព្រឹត្តឡើងដោយអ៊ីស្រាអែល» ហើយបានអំពាវនាវឱ្យពិភពលោក កុំធ្វើមិនដឹងមិនលឺចំពោះអ្វីដែលកំពុងកើតឡើងនៅតំបន់ហ្គាហ្សាស្ទ្រីប៕
រូបភាពពី AFP