(ឡុងដ៍)៖ សមាជិកសភាអភិរក្សនិយមនៅចក្រភពអង់គ្លេស ដែលបានធ្លាប់បានប្រាប់អ្នកសារព័ត៌មានកាលពីសប្តាហ៍មុនថា មេដឹកនាំលោកខាងលិចអាចប្រឈមមុខនឹងការកាត់ទោស ចំពោះការជាប់ពាក់ព័ន្ធនឹងឧក្រិដ្ឋកម្មសង្រ្គាមរបស់អ៊ីស្រាអែលនោះ ត្រូវបានចាប់ខ្លួនដោយសង្ស័យពីបទរំលោភសេពសន្ថវៈ និងការកាន់កាប់គ្រឿងញៀន។ នេះបើយោងតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃទី២៧ ខែតុលា ឆ្នាំ២០២៣។

លោក Crispin Blunt ដែលជាសមាជិកសភាអភិរក្សនិយម និងជាសហនាយកនៃមជ្ឈមណ្ឌលអន្តរជាតិសម្រាប់យុត្តិធម៌ប៉ាឡេស្ទីន បានបញ្ជាក់នៅលើបណ្តាញទំនាក់ទំនង X ថា លោកត្រូវបានចាប់ខ្លួន បន្ទាប់ពីមានរបាយការណ៍ថាអ្នកនយោបាយម្នាក់ ត្រូវបានចាប់ខ្លួនកាលពីថ្ងៃពុធសប្តាហ៍នេះ។

លោក Blunt បានសរសេរយ៉ាងដូច្នេះថា «មានសេចក្តីរាយការណ៍មកថា សមាជិកសភាម្នាក់ត្រូវបានចាប់ខ្លួនកាលពីម្សិលមិញ ពាក់ព័ន្ធនឹងការចោទប្រកាន់ពីបទរំលោភសេពសន្ថវៈ។ ខ្ញុំ​សូម​បញ្ជាក់​ថា ​សមាជិក​សភា​ម្នាក់នោះគឺ​ជា​ខ្ញុំ»។

បុរសអាយុ ៦៣ ឆ្នាំរូបនេះបានបន្ថែមថា «ការចាប់ខ្លួនគឺមិនសំខាន់ទេ ព្រោះខ្ញុំនៅតែត្រៀមខ្លួនជាស្រេចក្នុងការសហការពេញលេញ ជាមួយនឹងការស៊ើបអង្កេតដែលខ្ញុំជឿជាក់ថា នឹងបញ្ចប់ដោយគ្មានការចោទប្រកាន់។ ខ្ញុំ​មិន​មាន​បំណង​និយាយ​អ្វី​បន្ថែម​លើ​បញ្ហា​នេះ​ទេ រហូត​ទាល់​តែអាជ្ញាធរ​ប៉ូលីសបាន​បញ្ចប់​ការ​សាកសួរ​របស់​ពួក​គេ»។

គួរបញ្ជាក់ថា លោក Crispin Blunt បានវាយប្រហារខ្លាំងៗលើសមាជិករដ្ឋាភិបាលអង់គ្លេស ចំពោះការគាំំទ្រអ៊ីស្រាអែលក្នុងសង្គ្រាមជាមួយក្រុមហម៉ាស ដោយបានលើកឡើងថា រដ្ឋាភិបាលអង់គ្លេសអាចនឹងជាក់ពាក់ព័ន្ធក្នុងឧក្រិដ្ឋកម្មសង្គ្រាម ប្រសិនបើពួកគេនៅតែបន្តគាំទ្រសកម្មភាពរបស់អ៊ីស្រាអែលនៅតំបន់ហ្គាហ្សាស្ទ្រីប៕

រូបភាពពី AFP