(ប៉េកាំង)៖ កាលពីថ្ងៃព្រហស្បតិ៍សប្តាហ៍នេះ ក្រសួងការបរទេសចិន បាននិយាយថា សហរដ្ឋអាមេរិកមិនមានសិទ្ធិចូលមក​ពាក់ព័ន្ធ ក្នុងបញ្ហាវិវាទរវាងចិននិងហ្វីលីពីននោះទេ ខណៈហេតុការណ៍ប្រឈមមុខគ្នា បានកើនឡើងនៅតំបន់ដែនទឹកមានជម្លោះ នៃសមុទ្រចិនខាងត្បូង។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នៅថ្ងៃសុក្រ ទី២៧ ខែតុលា ឆ្នាំ២០២៣។

អ្នកនាំពាក្យក្រសួងការបរទេសចិន លោកស្រី Mao Ning បានលើកឡើងយ៉ាងដូច្នេះថា «សហរដ្ឋអាមេរិកមិនមែនជាភាគី ​នៅក្នុងបញ្ហាសមុទ្រចិនខាងត្បូងនោះទេ ដូច្នេះហើយអាមេរិកពុំមានសិទ្ធិអ្វី មកចូលពាក់ព័ន្ធក្នុងបញ្ហាវិវាទរវាងចិន និងហ្វីលីពីនឡើយ»។ លោកស្រីបានលើកឡើងបែបនេះ នៅពេលត្រូវបានសាកសួរអំពី ការដែលទីក្រុងវ៉ាស៉ីនតោនបានអះអាងថា នឹង​ការពារប្រទេសហ្វីលីពីន។

កាលពីថ្ងៃពុធសប្តាហ៍នេះ ប្រធានាធិបតីអាមេរិក លោក ចូ បៃដិន បាននិយាយថា ការប្តេជ្ញារបស់អាមេរិកចំពោះការការពារ​ហ្វីលីពីន គឺនៅតែបន្តរឹងមាំដូចដែក បន្ទាប់ពីទីក្រុងវ៉ាស៉ីនតោនបានចោទចិន ថាធ្វើសកម្មភាពគ្រោះថ្នាក់និងមិនស្របច្បាប់ នៅតំបន់សមុទ្រចិនខាងត្បូង។ លោក បៃដិន បានសង្កត់ធ្ងន់យ៉ាងដូច្នេះថា «ការវាយប្រហារណាមួយលើយន្តហោះ នាវា ឬកងកម្លាំងប្រដាប់អាវុធនៃប្រទេសហ្វីលីពីន នឹងតម្រូវឱ្យយើងអនុវត្តតាមសន្ធិសញ្ញាការពារជាតិទៅវិញទៅមក» ដែលសំដៅ​លើសន្ធិសញ្ញាការពារជាតិរវាងអាមេរិកនិងទីក្រុងម៉ានីល។

លោកស្រី Mao បាននិយាយដូច្នេះថា «ការសន្យារបស់អាមេរិកក្នុងការការពារហ្វីលីពីន មិនត្រូវប៉ះពាល់ដល់អធិបតេយ្យ ​និងផលប្រយោជន៍ដែនសមុទ្ររបស់ប្រទេសចិនដាច់ខាត ហើយក៏មិនត្រូវបើកដៃនិងលើកទឹកចិត្តដល់ ការទាមទារខុសច្បាប់របស់​ហ្វីលីពីនផងដែរ»។

គួរបញ្ជាក់ថា ប៉ុន្មានខែចុងក្រោយនេះ ចិននិងហ្វីលីពីនបានប្រឈមមុខគ្នាកាន់តែញឹកញាប់ នៅតំបន់សមុទ្រចិនខាងត្បូង ជាពិសេសនៅដែនទឹកមានវិវាទ ក្បែរតំបន់ថ្មប៉ប្រះទឹក Second Thomas Shoal ដែលជាផ្នែកនៃទីប្រជុំកោះ Spratly Islands។ កាលពីថ្ងៃសៅរ៍សប្តាហ៍មុន នាវាឆ្មាំសមុទ្រចិន១គ្រឿង បានប៉ះគ្នាជាមួយទូកដឹកសម្ភារផ្គត់ផ្គង់ សម្រាប់​កងទ័ពហ្វីលីពីន ដែលឈរជើងនៅតំបន់នោះ៕

រូបភាពពី Reuters