(វ៉ាស៉ីនតោន)៖ ក្រសួងការពារជាតិអាមេរិក បាននិយាយកាលពីថ្ងៃព្រហស្បតិ៍សប្តាហ៍នេះថា ប្រធានាធិបតីអាមេរិក លោក ចូ បៃដិន បានបញ្ជាឱ្យបើកការវាយប្រហារលើ មូលដ្ឋានចំនួន២កន្លែង នៅក្នុងប្រទេសស៉ីរី បន្ទាប់ពីមានការវាយប្រហារជាបន្តបន្ទាប់ ប្រឆាំងមកលើកងទ័ពអាមេរិក ក្នុងរយៈពេលប្រមាណជា ១សប្តាហ៍ចុងក្រោយនេះ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នៅថ្ងៃសុក្រ ទី២៧ ខែតុលា ឆ្នាំ២០២៣។
ក្នុងរយៈពេលខ្ទង់មួយសប្តាហ៍កន្លងមកនេះ កងកម្លាំងយោធាអាមេរិក បានស្ថិតក្រោមការវាយប្រហារសរុបជាង១០លើក នៅអ៉ីរ៉ាក់និងស៉ីរី ហើយទីក្រុងវ៉ាស៉ីនតោនសង្ស័យថា វាគឺជាស្នាដៃរបស់ក្រុមសកម្មប្រយុទ្ធ ដែលគាំទ្រដោយអ៉ីរ៉ង់។ Hamas, Islamic Jihad ដែលមានមូលដ្ឋាននៅតំបន់ Gaza Strip, Hezbollah នៅឯប្រទេសលីបង់ និងក្រុមសកម្មប្រយុទ្ធដទៃទៀតនៅស៉ីរី គឺសុទ្ធតែគាំទ្រដោយអ៉ីរ៉ង់។ កាលពីថ្ងៃព្រហស្បតិ៍សប្តាហ៍នេះ រដ្ឋមន្រ្តីការបរទេសអ៉ីរ៉ង់ បាននិយាយនៅអង្គការសហប្រជាជាតិថា ប្រសិនបើសង្រ្គាមអ៉ីស្រាអែលប្រឆាំងក្រុម Hamas មិនបញ្ឈប់ទេនោះ សហរដ្ឋអាមេរិកក៏នឹងមិនរួចខ្លួនពីភ្លើងជម្លោះដែរ។
មន្ទីរបញ្ចកោណបានឱ្យដឹងថា កាលពីថ្ងៃព្រហស្បតិ៍ យោធាអាមេរិកបានបើកការវាយប្រហារទៅលើមូលដ្ឋាន២កន្លែង នៅភាគខាងកើតប្រទេសស៉ីរី ដែលត្រូវបានប្រើប្រាស់ដោយកងកម្លាំងឆ្មាំបដិវត្តន៍អ៉ីរ៉ង់ ក៏ដូចជាក្រុមសកម្មប្រយុទ្ធផ្សេងទៀត ដែលគាំទ្រដោយទីក្រុងតេហេរ៉ង់។ លោក Lloyd Austin រដ្ឋមន្រ្តីការពារជាតិអាមេរិក បានលើកឡើងថា «ការវាយប្រហារការពារខ្លួនទាំងនេះ គឺជាការឆ្លើយតបចំពោះការវាយប្រហារជាបន្តបន្ទាប់ ដែលភាគច្រើនមិនជោគជ័យ ប្រឆាំងមកលើកងទ័ពអាមេរិក នៅក្នុងប្រទេសអ៉ីរ៉ាក់និងស៉ី ពីសំណាក់ក្រុមសកម្មប្រយុទ្ធផ្សេងៗ គាំទ្រដោយអ៉ីរ៉ង់ ដែលបានចាប់ផ្តើមតាំងពីថ្ងៃទី១៧ ខែតុលាមក។ ការវាយប្រហារដែលគាំទ្រដោយអ៉ីរ៉ង់ទាំងនេះ ប្រឆាំងនឹងកងទ័ពអាមេរិក គឺជារឿងមិនអាចទទួលយកបានដាច់ខាត ហើយត្រូវបញ្ឈប់ជាបន្ទាន់»។
បើតាមការអះអាងរបស់សេតវិមាន កាលពីថ្ងៃព្រហស្បតិ៍ ប្រធានាធិបតីអាមេរិក លោក ចូ បៃដិន ក៏បានផ្ញើសារយ៉ាងកម្រមួយទៅកាន់ មេដឹកនាំកំពូលអ៉ីរ៉ង់ លោក Ayatollah Ali Khamenei ដោយផ្ទាល់ផងដែរ ដើម្បីព្រមានអ៉ីរ៉ង់ប្រឆាំងនឹងការវាយប្រហារមកលើ កងទ័ពអាមេរិកនៅតំបន់មជ្ឈិមបូព៌ា។
គួរបញ្ជាក់ថា ចាប់តាំងពីការវាយប្រហារដ៏ភ្ញាក់ផ្អើលរបស់ក្រុម Hamas លើអ៉ីស្រាអែលដែលជាសម្ព័ន្ធមិត្តអាមេរិក កាលពីថ្ងៃទី៧ ខែតុលាមក យោធាអ៉ីស្រាអែល បានបន្តធ្វើការទម្លាក់គ្រាប់បែកយ៉ាងខ្លាំងក្លាបំផុត ទៅលើតំបន់ Gaza Strip។ ខាងអ៉ីស្រាអែល បានអះអាងថា អំលុងការវាយប្រហាររបស់ Hamas មនុស្សប្រមាណ ១,៤០០នាក់បានស្លាប់ ភាគច្រើនជាជនស៉ីវិល ហើយជាង២០០នាក់ទៀត ត្រូវបានចាប់ជាចំណាប់ខ្មាំង។ រីឯខាងតំបន់ Gaza បានអះអាងថា ជនជាតិប៉ាឡេស្ទីនជាង ៧,០០០នាក់ហើយ ត្រូវបានសម្លាប់ ដោយសារការវាយប្រហារសងសឹកតាមផ្លូវអាកាសរបស់អ៉ីស្រាអែល ភាគច្រើនជាជនស៉ីវិលដូចគ្នា។ ក្នុងពេល៣សប្តាហ៍ចុងក្រោយនេះ អាមេរិកបានបញ្ជូននាវានិងយន្តហោះចម្បាំង ព្រមទាំងកងទ័ពបន្ថែមទៅកាន់មជ្ឈិបូព៌ា ចំពោះមុខក្តីព្រួយបារម្ភអំពីហានិភ័យ នៃការរីករាលដាលភ្លើងជម្លោះកាន់តែធំ៕
រូបភាពពីកងទ័ពអាកាសអាមេរិក
