(វ៉ាស៉ីនតោន)៖ ប្រព័ន្ធផ្សព្វផ្សាយអាមេរិក NBC News ដោយផ្អែកលើប្រភពពីមន្រ្តីប៉ូលិស បានរាយការណ៍ថា មនុស្សយ៉ាងហោចចំនួន២២នាក់ បានបាត់បង់ជីវិត និងប្រហែល៥០-៦០នាក់ផ្សេងទៀត បានទទួលរងរបួសនាវេលាយប់ថ្ងៃពុធសប្តាហ៍នេះ (ពេលវេលាក្នុងតំបន់) ក្នុងករណីបាញ់ប្រហារទ្រង់ទ្រាយធំ ដែលកើតឡើង នៅទីតាំងច្រើនកន្លែងផ្សេងគ្នា ក្នុងទីក្រុង Lewiston នៃរដ្ឋ Maine របស់សហរដ្ឋអាមេរិក។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នៅថ្ងៃព្រហស្បតិ៍ ទី២៦ ខែតុលា ឆ្នាំ២០២៣។

ក្រុមមន្រ្តីប៉ូលិសប្រចាំទីក្រុង Lewiston និងរដ្ឋ Maine បានឱ្យដឹងថា មានករណីខ្មាន់កាំភ្លើងកំពុងដើរបាញ់សម្លាប់មនុស្ស ហើយពួកគេ​កំពុងតាមស្វែងរកជនសង្ស័យ ដែលមិនទាន់ត្រូវឃាត់ខ្លួនបាននៅឡើយ ប៉ុន្តែមិនមានការផ្តល់តួលេខជនរងគ្រោះផ្លូវការនោះទេ។ ស្ថាប័នប៉ូលិស​ទីក្រុង Lewiston បានបង្ហោះរូបថតជនសង្ស័យ៣សន្លឹក ដែលហាក់ប្រដាប់ដោយកាំភ្លើងវែង១ដើម ប្រភេទពាក់កណ្តាលស្វ័យប្រវត្តិ។ ចំណែក​ប៉ូលិសរដ្ឋ Maine បានស្នើកុំឱ្យប្រជាជនចេញមកខាងក្រៅ និងបិទទ្វារចាក់សោនៅក្នុងផ្ទះ ខណៈអាជ្ញាធរកំពុងធ្វើការស៉ើបអង្កេតនៅទីតាំងច្រើនកន្លែង។

ប្រសិនបើតួលេខអ្នកស្លាប់២២នាក់ខាងលើ ត្រូវបានទទួលស្គាល់ជាការពិត នោះវានឹងក្លាយជាករណីបាញ់ប្រហារដ៏ប្រល័យបំផុត នៅក្នុង​សហរដ្ឋអាមេរិក គិតចាប់តាំងពី យ៉ាងហោចឆ្នាំ២០១៩ នៅពេលខ្មាន់កាំភ្លើងម្នាក់បានធ្វើសកម្មភាពបាញ់ប្រហារ នៅផ្សារទំនើប Walmart ក្នុងទីក្រុង El Paso ជាមួយកាំភ្លើងវែង Ak-47 ហើយបានសម្លាប់មនុស្ស២៣នាក់។ ក្រុមរដ្ឋអាជ្ញាអាមេរិក បានចាត់ទុក​ករណីនោះថា ជាឧក្រិដ្ឋកម្មស្អប់ខ្ពើមជនជាតិអាមេរិកឡាទីន។

គួរបញ្ជាក់ថា រីឯ ករណីបាញ់ប្រហារដ៏ប្រល័យបំផុតនៅសហរដ្ឋអាមេរិក ដែលត្រូវបានកត់ត្រា គឺការសម្លាប់រង្គាលមនុស្សរហូតដល់៥៨នាក់ ក្រោមដៃខ្មាន់កាំភ្លើងម្នាក់ ដែលបានធ្វើសកម្មភាពបាញ់ប្រហារចេញពីសណ្ឋាគារកម្ពស់ខ្ពស់ ទៅលើហ្វូងមនុស្សដែលចូលរួមបុណ្យតន្រ្តីមួយ នៅទីក្រុង Las Vegas នៃរដ្ឋ Nevada កាលពីឆ្នាំ២០១៧។ យោងតាមអង្គការ Gun Violence Archive នៅក្នុងឆ្នាំ២០២៣នេះ សហរដ្ឋអាមេរិក បានកត់ត្រាករណីបាញ់ប្រហារទ្រង់ទ្រាយធំ ដែលមានមនុស្សចាប់ពី៤នាក់ឡើងទៅ ស្លាប់ឬរបួស លើសពី៥០០ករណី៕

រូបភាពពី Reuters

រូបភាពជនសង្ស័យជាខ្មាន់កាំភ្លើង (ប្រភពពី Reuters)