(ដាក្កា)៖ នៅថ្ងៃពុធនេះ មនុស្សជិត២៧៥,០០០នាក់នៅប្រទេសបង់ក្លាដែស បាននាំគ្នាភៀសខ្លួនទៅកាន់មជ្ឈមណ្ឌលជ្រកកោនសុវត្ថិភាព ខណៈដែលព្យុះស៉ីក្លូនឈ្មោះ Hamoon បានបោកបក់លើបណ្តោយឆ្នេរភាគអាគ្នេយ៍នៃប្រទេសអាស៉ីខាងត្បូងមួយនេះ ហើយសម្លាប់មនុស្ស២នាក់។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃពុធ ទី២៥ ខែតុលា ឆ្នាំ២០២៣។

លោក Kamrul Hasan លេខាធិការក្រសួងគ្រប់គ្រងគ្រោះមហន្តរាយបង់ក្លាដែស បានប្រាប់ក្រុមអ្នកសារព័ត៌មានដូច្នេះថា «យើងបាន​ជម្លៀសមនុស្សសរុប២៧៣,៣៥២នាក់ ទៅកាន់មជ្ឈមណ្ឌលជ្រកកោនសុវត្ថិភាព ខណៈមនុស្ស២នាក់បានបាត់បង់ជីវិត ក្នុងនោះម្នាក់បានស្លាប់ដោយសារដើមឈើបាក់សង្កត់ និងម្នាក់ទៀតដោយសារអគារដួលរលំ។ ក្រៅពីនេះមនុស្សយ៉ាងហោច១០នាក់ ក៏បានរងរបួស និងកំពុងទទួលការព្យាបាលនៅតាមមន្ទីរពេទ្យ ផងដែរ»។

អ្នកជំនាញផ្នែកឧតុនិយមរបស់បង់ក្លាដែស បាននិយាយថា ព្យុះស៉ីក្លូន Hamoon បានធ្វើដំណើរមកដល់ស្រុក Chittagong និង Cox's Bazar កាលពីវេលាយប់រំលងអធ្រាត្រថ្ងៃពុធនេះ ជាមួយកម្លាំងខ្យល់ល្បឿនអតិបរមា១០៤គីឡូម៉ែត្រក្នុង១ម៉ោង។ បើតាមការព្យាករ ព្យុះស៉ីក្លូននេះនឹង​បន្តបោកបក់នៅលើផ្ទៃដី ហើយថយចុះឥទ្ធិពលដោយសន្សឹមៗ។

គួរបញ្ជាក់ថា កាលពីខែឧសភា ឆ្នាំនេះ ព្យុះស៉ីក្លូនឈ្មោះ Mocha បានក្លាយជាព្យុះខ្លាំងក្លាបំផុត ដែលបានវាយប្រហារលើបង់ក្លាដែស គិតចាប់តាំងពីព្យុះស៉ីក្លូន Sidr កាលពីខែវិច្ឆិកា ឆ្នាំ២០០៧។ ព្យុះ Sidr បានឆក់យកជីវិតមនុស្សជាង៣,០០០នាក់ ហើយបង្កឱ្យមាន​ការខូចខាតគិតជាទឹកប្រាក់រាប់ពាន់លានដុល្លារ៕

រូបភាពពី AFP