(ហ៊្សេរុយសាឡិម)៖ កាលពីថ្ងៃអាទិត្យកន្លងទៅនេះ រដ្ឋមន្រ្តីការពារជាតិអ៉ីស្រាអែល បាននិយាយថា សង្រ្គាមដែលកំពុងប្រព្រឹត្តទៅ ប្រឆាំង​ក្រុមសកម្មប្រយុទ្ធហាម៉ាសប៉ាឡេស្ទីន អាចនឹងអូសបន្លាយពេលច្រើនខែ ក៏ប៉ុន្តែលោកបានអះអាងថា វានឹងជាសង្រ្គាមចុងក្រោយបង្អស់ ជាមួយពួកហាម៉ាស។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃចន្ទ ទី២៣ ខែតុលា ឆ្នាំ២០២៣។

ប្រមុខការពារជាតិអ៉ីស្រាអែល លោក ​Yoav Gallant បានបង្កើនសង្រ្គាមពាក្យសម្តីបែបនេះជាមួយក្រុមហាម៉ាស ខណៈលោកបានជួប​សន្ទនាជាមួយកងកម្លាំងយោធាអ៉ីស្រាអែល ដែលបានប្រមូលផ្តុំគ្នាត្រៀមសម្រាប់អ្វីដែលគេរំពឹង នឹងជាការបើកប្រតិបត្តិការយោធាជើងគោក​ទ្រង់ទ្រាយធំ ចូលទៅកាន់ដែនដីប៉ាឡេស្ទីន Gaza Strip ដែលគ្រប់គ្រងដោយហាម៉ាស ឆ្លើយតបចំពោះការឆ្មក់វាយប្រហារដ៏ភ្ញាក់ផ្អើល ​របស់ក្រុមសកម្មប្រយុទ្ធប៉ាឡេស្ទីនមួយនេះ លើទឹកដីអ៉ីស្រាអែលកាលពីថ្ងៃទី៧ ខែតុលា។ បើតាមក្រុមមន្រ្តីអ៉ីស្រាអែល ការវាយប្រហាររបស់ក្រុមហាម៉ាស បានបន្សល់ទុកមនុស្សស្លាប់ប្រហែល១,៤០០នាក់ ដែលជាការវាយប្រហារដ៏ប្រល័យបំផុត ក្នុងប្រវត្តិសាស្រ្តអ៉ីស្រាអែល។

លោករដ្ឋមន្រ្តីការពារជាតិអ៉ីស្រាអែល បានលើកឡើងដូច្នេះថា «វាអាចនឹងចំណាយពេល១ខែ ២ខែ ឬ៣ខែ ប៉ុន្តែនៅទីបញ្ចប់នឹងលែង​មានវត្តមានហាម៉ាសតទៀតឡើយ។ មុនពេលក្រុមហាម៉ាសប៉ះគ្នាទង្គិចគ្នាផ្ទាល់ ជាមួយរថក្រោះនិងកងទ័ពរបស់យើង ពួកគេនឹងបន្តរង​ការទម្លាក់គ្រាប់បែកពីកងទ័ពអាកាសយើង។ នេះនឹងជាសង្រ្គាមលើកចុងក្រោយបង្អស់នៅ Gaza ដោយសារតែហេតុផលសាមញ្ញបំផុត គឺការលែងមានមុខពួកហាម៉ាសតទៅទៀត។

អ៉ីស្រាអែល ដែលប្តេជ្ញាម្តងហើយម្តងទៀតនឹងកម្ចាត់ក្រុមហាម៉ាសចោលទាំងស្រុង បាននិយាយថា យុទ្ធនាការវាយប្រហារតាមផ្លូវអាកាស​របស់ខ្លួន មានគោលដៅលើក្រុមមេបញ្ជាការនិងហេដ្ឋារចនាសម្ព័ន្ធរបស់ពួកហាម៉ាស។ យ៉ាងណាមិញ ក្រសួងសុខាភិបាលតំបន់ Gaza ដែល​គ្រប់គ្រងដោយហាម៉ាស បានអះអាងកាលពីថ្ងៃអាទិត្យថា ជនជាតិប៉ាឡេស្ទីនលើស៤,៦០០នាក់ហើយ ត្រូវបានសម្លាប់ដោយការទម្លាក់គ្រាប់បែក​ ក្នុងនោះមានកុមារជាង១,៨០០នាក់៕

រូបភាពពីក្រសួងការពារជាតិអ៉ីស្រាអែល