(វ៉ាស៊ីនតោន)៖ មន្ទីរបញ្ចកោណ បាននិយាយថាសហរដ្ឋអាមេរិក នឹងបញ្ជូនប្រព័ន្ធមីស៊ីល THAAD មួយគ្រឿង និងប្រព័ន្ធមីស៊ីល Patriot បន្ថែមទៅកាន់តំបន់ មជ្ឈិមបូព៌ា ជាការឆ្លើយតបទៅនឹងការវាយប្រហារថ្មីៗនេះលើកងទ័ពអាមេរិក នៅក្នុងតំបន់។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអាទិត្យ ទី២២ ខែតុលា ឆ្នាំ២០២៣។

សហរដ្ឋអាមេរិក បានបញ្ជូននាវាចម្បាំងជាច្រើនគ្រឿងរួចទៅហើយ ទៅកាន់តំបន់មជ្ឈិមបូព៌ា នាប៉ុន្មានសប្ដាហ៍ថ្មីៗនេះ ក្នុងនោះរួមមានទាំងនាវាផ្ទុកយន្ដហោះ ចម្បាំង ២គ្រឿង អមដំណើរដោយនាវាពិឃាតជាច្រើនគ្រឿង និងទាហាម៉ារីននៅលើនោះជាង ២,០០០នាក់។ នៅក្នុងសេចក្ដីថ្លែងការណ៍មួយចេញផ្សាយ នៅថ្ងៃសៅរ៍ ទី២១ ខែតុលា (ម៉ោងនៅវ៉ាស៊ីនតោន) រដ្ឋមន្ត្រីការពារជាតិអាមេរិក លោក Lloyd Austin បានគូសបញ្ជាក់ដូច្នេះថា «បន្ទាប់ពីមានការពិភាក្សាយ៉ាង ល្អិតល្អន់ជាមួយលោក​ប្រធានាធិបតី (ចូ) បៃដិន ស្ដីពីការកើនឡើងសកម្មភាពរបស់អ៉ីរ៉ង់ និងចលនាប្រដាប់អាវុធគាំទ្រដោយអ៉ីរ៉ង់ ក្នុងតំបន់មជ្ឈិមបូព៌ា នៅថ្ងៃនេះ ខ្ញុំបានដាក់ចេញវិធានការបន្ថែមដើម្បីពង្រឹងការត្រៀមលក្ខណៈរបស់ក្រសួងការពារជាតិអាមេរិក ក្នុងតំបន់»។

បើតាមលោក Lloyd Austin កងទ័ពអាមេរិកមួយចំនួន ក៏ត្រូវបានបង្គាប់ឱ្យត្រៀមលក្ខណៈសម្រាប់ការដាក់ពង្រាយផងដែរ ប៉ុន្តែមិនបានបញ្ជាក់ពីចំនួននោះទេ ស្របពេលមន្ទីរបញ្ចកោណ បានដាក់ឱ្យកងទ័ពជាង ២,០០០នាក់ ប្រុងជើងការខ្ពស់ ដើម្បីត្រៀមខ្លួនសម្រាប់ការដាក់ពង្រាយទៅកាន់តំបន់មជ្ឈិមបូព៌ា។

គួរបញ្ជាក់ថា ការប្រកាសពីដាក់ពង្រាយប្រព័ន្ធមីស៊ីលខាងលើរបស់សហរដ្ឋអាមេរិក កើតមានឡើង ២ឆ្នាំ បន្ទាប់ពីរដ្ឋបាលលោក បៃដិន បានដកប្រព័ន្ធមីស៊ីល មួយចំនួនចេញពីតំបន់មជ្ឈិមបូព៌ា ដោយសំអាងលើការកាត់បន្ថយភាពតានតឹងជាមួយអ៉ីរ៉ង់៕

រូបភាពពី Reuters