(វ៉ាស៉ីនតោន)៖ កាលពីថ្ងៃសុក្រសប្តាហ៍នេះ ប្រធានាធិបតីអាមេរិក លោក ចូ បៃដិន បាននិយាយថា ការឆ្មក់វាយប្រហារទ្រង់ទ្រាយធំកាលពីថ្ងៃទី៧ ខែតុលា របស់ក្រុមសកម្មប្រយុទ្ធហាម៉ាសប៉ាឡេស្ទីន គឺមានគោលដៅចង់បំផ្លាញលទ្ធភាព នៃការធ្វើប្រក្រតីកម្មទំនាក់ទំនង រវាងអ៉ីស្រាអែលនិងអារ៉ាប៊ីសាអូឌីត។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នៅថ្ងៃសៅរ៍ ទី២១ ខែតុលា ឆ្នាំ២០២៣។
អារ៉ាប៊ីសាអូឌីត ដែលជាប្រទេសអារ៉ាប់ដ៏មានឥទ្ធិពលមួយ ប្រចាំនៅតំបន់មជ្ឈិមបូព៌ា និងជាកន្លែងដែលទីសក្ការៈដ៏ពិសិដ្ឋបំផុតចំនួន២ នៃសាសនាឥស្លាមស្ថិតនៅ បានសាទរចំពោះការផ្សារភ្ជាប់ទំនាក់ទំនង របស់ប្រទេសជិតខាងខ្លួននៅតំបន់ឈូងសមុទ្រពែរ្ស គឺអេមីរ៉ាត់អារ៉ាប់រួមនិងបារ៉ែន ជាមួយអ៉ីស្រាអែលកាលពីឆ្នាំ២០២០ ក្រោមការសម្របសម្រួលរបស់ រដ្ឋបាលអតីតប្រធានាធិបតីអាមេរិក លោក ដូណាល់ ត្រាំ។ ទីក្រុងរីយ៉ាដមិនបានដើរតាមអេមីរ៉ាត់អារ៉ាប់រួមនិងបារ៉ែនទេ ដោយនិយាយថា គោលដៅនៃការសម្រេចបានឱ្យភាពជាប្រទេសសម្រាប់ប៉ាឡេស្ទីន គួរតែត្រូវដោះស្រាយឱ្យរួចរាល់ជាមុនសិន។
យ៉ាងណាមិញ កាលពីថ្ងៃសុក្រ លោក បៃដិន បានលើកឡើងយ៉ាងដូច្នេះថា «ហេតុផលមួយដែលក្រុមហាម៉ាស សម្រេចធ្វើសកម្មភាពលើអ៉ីស្រាអែល គឺពួកគេបានដឹងថា ខ្ញុំប្រុងនឹងទៅជជែកជាមួយអារ៉ាប៊ីសាអូឌីត។ តើមានដឹងដែរទេថា តាមពិតអារ៉ាប៊ីសាអូឌីតចង់ទទួលស្គាល់អ៉ីស្រាអែល»។ ក្នុងបទសម្ភាសមួយដែលចាក់ផ្សាយ កាលពីថ្ងៃអាទិត្យចុងសប្តាហ៍មុន លោកប្រធានាធិបតីអាមេរិក បាននិយាយថា លទ្ធភាពនៃការធ្វើប្រក្រតីកម្មទំនាក់ទំនងរវាងប្រទេសទាំងពីរ គឺមិនទាន់រលាយសាបសូន្យទាំងស្រុងទេ ប៉ុន្តែវានឹងត្រូវការពេលយូរ។
គួរបញ្ជាក់ថា លទ្ធភាពនៃការធ្វើប្រក្រតីកម្មទំនាក់ទំនងរវាងអ៉ីស្រាអែល ជាមួយអារ៉ាប៊ីសាអូឌីត ក៏ដូចជាជាមួយប្រទេសអារ៉ាប់ដទៃទៀត គឺជាអាទិភាពចម្បងមួយ សម្រាប់រដ្ឋមន្រ្តីការបរទេសអាមេរិក លោក Antony Blinken អំលុងទស្សនកិច្ចទៅកាន់ទីក្រុងរីយ៉ាដកាលពីខែមិថុនា។ មួយថ្ងៃក្រោយការវាយប្រហាររបស់ក្រុមហាម៉ាស លោក Blinken បានលើកឡើងថា វាគ្មានអ្វីត្រូវភ្ញាក់ផ្អើលទេ ប្រសិនបើចេតនាមួយផ្នែក នៅពីក្រោយការវាយប្រហារនោះ គឺប្រហែលជាដើម្បីបង្អាក់កិច្ចប្រឹងប្រែងនាំអារ៉ាប៊ីសាអូឌីត និងអ៉ីស្រាអែលឱ្យត្រូវគ្នា។
ឆ្លើយតបចំពោះទង្វើរបស់ហាម៉ាស អ៉ីស្រាអែលបានបើកការវាយប្រហារតាមផ្លូវអាកាសយ៉ាងខ្លាំងក្លាបំផុត លើតំបន់ Gaza Strip ដែលយោងតាមអាជ្ញាធរប៉ាឡេស្ទីន គឺបានផ្តាច់ជីវិតមនុស្សកើនដល់ជាង៤,១០០នាក់ ហើយអ៉ីស្រាអែលបានប្តេជ្ញាថា នឹងកម្ចាត់ក្រុមហាម៉ាសចោលទាំងស្រុង៕
រូបភាពពី Reuters
