(វ៉ាស៊ីនតោន)៖ ប្រធានាធិបតីអាមេរិក លោក Joe Biden បានប្រកាសថា វាមានសារៈសំខាន់ខ្លាំងណាស់ ចំពោះសន្តិសុខជាតិរបស់អាមេរិក ក្នុងការណ៍ដែលអ៊ីស្រាអែល និងអ៊ុយក្រែន បានទទួលជោគជ័យក្នុងសង្គ្រាមរបស់ពួកគេ ខណៈដែលលោកបានត្រៀមស្នើសុំប្រាក់រាប់ពាន់លានដុល្លារ សម្រាប់ជំនួយយោធាសម្រាប់ប្រទេសទាំងពីរ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃទី២០ ខែតុលា​ ឆ្នាំ២០២៣។

នៅក្នុងសុន្ទរកថាការិយាល័យរាងពងក្រពើដ៏កម្រមួយកាលពីយប់ថ្ងៃព្រហស្បតិ៍ លោក Biden បាននិយាយដូច្នេះថា «ប្រសិនបើការឈ្លានពានអន្តរជាតិ ត្រូវបានអនុញ្ញាតឱ្យបន្ត នោះជម្លោះនិងភាពវឹកវរអាចរីករាលដាលដល់ផ្នែកផ្សេងទៀតនៃពិភពលោក»។

លោកបាននិយាយទៀតថា «ក្រុមហាម៉ាស និងលោក ពូទីន តំណាងឱ្យការគំរាមកំហែងពីរផ្សេងគ្នា។ ប៉ុន្តែពួកគេមានចំណុចដូចគ្នា ពួកគេទាំងពីរចង់បំផ្លាញលទ្ធិប្រជាធិបតេយ្យ ប្រទេសដែលនៅជិតខាងទាំងស្រុង»។

លោក Biden ក៏បាននិយាយផងដែរថា លោកនឹងស្នើមូលនិធិបន្ទាន់មួយទៅកាន់សភាដែលរំពឹងថា នឹងឈានដល់ប្រហែល ១០០ ពាន់លានដុល្លារនៅឆ្នាំក្រោយ។ សំណើដែលនឹងត្រូវបង្ហាញនៅថ្ងៃសុក្រនេះ រួមមានការផ្តល់មូលនិធិសម្រាប់អ៊ុយក្រែន អ៊ីស្រាអែល តៃវ៉ាន់ ជំនួយមនុស្សធម៌ និងការគ្រប់គ្រងព្រំដែនជាដើម។

លោកបានសង្កត់ធ្ងន់ដូច្នេះទៀតថា «វាគឺជាការវិនិយោគដ៏ឆ្លាតវៃ ដែលនឹងផ្តល់ផលប្រយោជន៍សម្រាប់សន្តិសុខអាមេរិកជាច្រើនជំនាន់»៕

រូបភាពពី AFP