(តូក្យូ)៖ ជប៉ុនបានឱ្យដឹងកាលពីថ្ងៃព្រហស្បតិ៍សប្តាហ៍នេះថា ខ្លួនបានអញ្ជើញអូស្រ្តាលីឱ្យចូលរួមជាលើកដំបូង ក្នុងការធ្វើសមយុទ្ធយោធាជាប្រចាំចំនួន២ ដែលប្រព្រឹត្តទៅជាមួយសហរដ្ឋអាមេរិក។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នៅថ្ងៃសុក្រ ទី២០ ខែតុលា ឆ្នាំ២០២៣។

រដ្ឋមន្រ្តីការពារជាតិជប៉ុន លោក Minoru Kihara បានប្រាប់ថា រូបលោកបានពិភាក្សា អំពីការចូលរូមរបស់ប្រទេសអូស្រ្តាលី នៅក្នុងសមយុទ្ធយោធា​ខាងលើ អំលុងជំនួបនៅទីក្រុងតូក្យូ ជាមួយរដ្ឋមន្រ្តីការពារជាតិអូស្រ្តាលី លោក Richard Marles។ ថ្លែងប្រាប់ក្រុមអ្នកសារព័ត៌មាន នៅក្រោយ​កិច្ចពិភាក្សានោះ លោក Kihara បាននិយាយយ៉ាងដូច្នេះថា «ពួកយើងកំពុងពង្រីកកិច្ចសហប្រតិបត្តិការ ផ្នែកការពារជាតិជាមួយអូស្រ្តាលី នៅគ្រប់ផ្នែក។ គោលដៅរបស់យើង គឺនៅពេលមានគ្រោះអាសន្ន ពួកយើងនឹងអាចធ្វើការជាមួយគ្នាយ៉ាងជិតស្និទ្ធ»។ ប្រទេសទាំង២ ក៏បានយល់ស្របលើ ​ការរួមគ្នាអភិវឌ្ឍបរិក្ខារយោធាផងដែរ។

គួរបញ្ជាក់ថា ក្នុងចំណោមសមយុទ្ធយោធាទាំង២ សមយុទ្ធមួយដំបូងនឹងប្រព្រឹត្តទៅ ក្នុងខែវិច្ឆិកាខាងមុខនេះ ហៅថា Yama Sakura ដែលមានការចូលរួមពី កងកម្លាំងស្វ័យការពារ SDF របស់ជប៉ុន និងកងទ័ពជើងគោកអាមេរិក។ ចំណែកសមយុទ្ធយោធាទី២ ហៅថា Keen Edge នឹងប្រព្រឹត្តទៅនាថ្ងៃកុម្ភៈ ឆ្នាំ២០២៤ ហើយមានការចូលរួមពីកងកម្លាំង SDF និងកងម៉ារីនអាមេរិក៕

រូបភាពពី Reuters