(ឌូបៃ)៖ មេដឹកនាំកំពូលអ៊ីរ៉ង់ លោក Ayatollah Ali Khamenei បាននិយាយថា «អំពើប្រល័យពូជសាសន៍» របស់អ៊ីស្រាអែលលើជនជាតិប៉ាឡេស្ទីន នៅតំបន់ហ្គាហ្សាស្ទ្រីប ត្រូវតែបញ្ឈប់បន្ទាន់ មួយថ្ងៃមុនពេលប្រធានាធិបតីអាមេរិក លោក Joe Biden បំពេញទស្សនកិច្ចនៅអ៊ីស្រាអែល។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃទី១៧ ខែតុលា ឆ្នាំ២០២៣។
អ៊ីស្រាអែលបានប្តេជ្ញាលុបបំបាត់ចលនាហាម៉ាស ដែលគាំទ្រដោយទីក្រុងតេហេរ៉ង់ដែលគ្រប់គ្រងតំបន់ហ្គាហ្សាស្ទ្រីប បន្ទាប់ពីក្រុមអ្នកប្រយុទ្ធរបស់ពួកគេ បានវាយប្រហារលើអ៊ីស្រាអែលកាលពីថ្ងៃទី០៧ ខែតុលា ដោយបានសម្លាប់មនុស្ស ១,៣០០ នាក់ ដែលភាគច្រើនជាជនស៊ីវិល នៅក្នុងថ្ងៃដ៏បង្ហូរឈាមបំផុតក្នុងប្រវត្តិសាស្ត្រ ៧៥ ឆ្នាំរបស់ប្រទេសនេះ។
លោក Khamenei បានប្រាប់ក្រុមនិស្សិតនៅទីក្រុងតេហេរ៉ង់នៅថ្ងៃអង្គារនេះថា «គ្មាននរណាម្នាក់អាចប្រឈមមុខនឹងប្រជាជនម៉ូស្លីម និងកម្លាំងតស៊ូរបស់ពួកគេបានទេ ប្រសិនបើឧក្រិដ្ឋកម្មរបស់របបស៊ីយ៉ូនប្រឆាំងនឹងប៉ាឡេស្ទីននៅតែបន្ត... ការទម្លាក់គ្រាប់បែកនៅតំបន់ហ្គាហ្សាត្រូវតែបញ្ឈប់ជាបន្ទាន់»។
លោកបាននិយាយដូច្នេះថា «ពិភពលោកកំពុងមើលឃើញពីអំពើប្រល័យពូជសាសន៍ ដែលប្រព្រឹត្តដោយរបបស៊ីយ៉ូននិយមប្រឆាំងនឹងប៉ាឡេស្ទីននៅហ្គាហ្សា»។ លោកបានបន្ថែមថា «យើងត្រូវតែឆ្លើយតបទៅនឹងអ្វីដែលកំពុងកើតឡើងនៅក្នុងតំបន់ហ្គាហ្សា...មន្ត្រីអ៊ីស្រាអែលត្រូវតែត្រូវបានកាត់ទោសចំពោះឧក្រិដ្ឋកម្មរបស់ពួកគេ ប្រឆាំងនឹងប៉ាឡេស្ទីននៅក្នុងតំបន់ហ្គាហ្សា»។
គួរបញ្ជាក់ថា ការគាំទ្រចំពោះបុព្វហេតុប៉ាឡេស្ទីន គឺជាសសរស្តម្ភនៃសាធារណរដ្ឋអ៊ីស្លាមចាប់តាំងពីបដិវត្តន៍ឆ្នាំ ១៩៧៩ និងជាវិធីមួយដែលប្រទេសដែលគ្រប់គ្រងដោយនិកាយស៊ីអ៊ីតមួយនេះ បានដាក់ខ្លួនជាមេដឹកនាំនៃពិភពអ៊ីស្លាម។ អ៊ីស្រាអែល ដែលទីក្រុងតេហេរ៉ង់បដិសេធមិនទទួលស្គាល់នោះ បានចោទប្រកាន់មេដឹកនាំរបស់អ៊ីរ៉ង់ជាយូរមកហើយ ថា បានបង្កអំពើហិង្សាដោយផ្គត់ផ្គង់អាវុធដល់ក្រុមហាម៉ាស។
អ៊ីស្រាអែលបានទម្លាក់គ្រាប់បែកលើតំបន់ហ្គាហ្សាស្ទ្រីប ដោយការវាយប្រហារតាមអាកាស ដោយបានសម្លាប់ជនជាតិប៉ាឡេស្ទីនជាង ២,៨០០ នាក់ មួយភាគបួននៃពួកគេជាកុមារ និងបានជម្លៀសប្រហែលពាក់កណ្តាលនៃប្រជាជនហ្គាហ្សាសរុបចំនួន ២.៣ លាននាក់ចេញពីផ្ទះរបស់ពួកគេ។ ទន្ទឹមនឹងនេះ អ៊ីស្រាអែលក៏បានដាក់ការឡោមព័ទ្ធទាំងស្រុងលើតំបន់ព័ទ្ធជុំវិញ ដោយកាត់ផ្តាច់ស្បៀងអាហារ ប្រេងឥន្ធនៈ និងការផ្គត់ផ្គង់ផ្នែកវេជ្ជសាស្រ្ដផងដែរ៕
រូបភាពពី Reuters
